«Առաջին դեպքը չէ, երբ տեղական ինկվիզիտորները չեղարկում են արտիստին»․ Թագուհի Ղազարյան

ԱԺ ՔՊ-ական պատգամավոր Թագուհի Ղազարյանի ֆեյսբուքյան գրառումը․ «Սևդալիզա անունով երգչուհու գոյության մասին առաջին անգամ իմացա այն կապակցությամբ, երբ Coca-Cola-ն հայտարարեց, որ նրա ելույթը չեղարկվել է։
Սա առաջին դեպքը չէ, երբ մեր տեղական ինկվիզիտորները չեղարկում են արտիստին՝ ըստ էության հիմքում դնելով արվեստը։
Ընդհանրապես աշխարհում կա պրակտիկա, երբ արտիստին չեղարկում են արվեստի հետ չկապված, մասնավոր կյանքում թույլ տված և բացահայտված սխալների կամ հանրայնորեն անընդունելի վարքի համար՝ ծանր հանցագործություններից մինչև տհաճ միջադեպեր։
Հայաստանում իմ հիշած բոլոր դեպքերը կապված են արտիստների արվեստի հետ։ Այսինքն սա ոչ այլ ինչ է, քան ցենզուրա։ Միշտ կգտնվեն մարդկանց խմբեր, ովքեր առաջադիմությունը, առաջադեմ արվեստը, գիտությունը կանվանեն սատանայականություն։ Այդպիսիք եղել են հազարամյակներով և դեռ երկար կլինեն։ Մարդկանց խարույկների վրա այրել են այն պատճառով, օրինակ, որ նրանք նկատել են, որ երկիրը կլոր է։ Դժվար է հիշել, թե արժեքավոր ժառանգություն թողած արվեստագետներից քանիսը չեն մեղադրվել այդպիսի մեղքերում։
Այստեղ հարցը այլ է. տեղի տալը։
Կհիշե՞ք, մի քանի շաբաթ առաջ «բարձր արվեստի սիրահարները» տարածում էին Համալիրում Թաթուլի համերգի տեսանյութերը ու պահանջում արգելել այդպիսի միջոցառումները։ Այն ժամանակ էլ, հիմա էլ իմ արձագանքը նույնն է. մի լսեք, եթե հաճելի չէ։ Մի արգելեք ուրիշներին լսել այն, ինչ հաճելի է։
Մինչև ո՞ւր ենք ուզում հասնել։ Եթե որոշենք ամեն մեկս մյուսի ճաշակի վրա արգելանք դնել, պարզապես բոլորս կհայտնվենք արգելանքի տակ։
Մշակութային քաղաքականության առումով մեր դիրքորոշումը հստակ է. Հայաստանում գրաքննությունը տեղ չունի։
Բայց այս քաղաքականության հետևից պետք է գնա յուրաքանչյուրը, ով նկատում է, որ այդպիսի ռիսկ կա»։