Ֆոն դեր Լեյենը կարող է դառնալ Գերմանիայի առաջին կին նախագահը

Գերմանիայի կանցլեր Ֆրիդրիխ Մերցը քննարկում է Եվրոհանձնաժողովի նախագահ Ուրսուլա ֆոն դեր Լեյենի թեկնածությունը 2027 թվականի նախագահական ընտրություններում առաջադրելու հարցը, հաղորդում է Der Spiegel ամսագիրը։
Աղբյուրը հիշեցնում է, որ երբ նրան հարցրել են, թե արդյոք կինը կարող է դառնալ հաջորդ նախագահը, նա պատասխանել է՝ դա լավ կլինի։ Միևնույն ժամանակ, նշվում է, որ թեկնածուների ցուցակում ներկայում ընդգրկված են Բունդեսթագի նախագահ Յուլիա Կլյոկները, ընտանիքի հարցերով նախարար Կարին Պրիենը և Բավարիայի խորհրդարանի խոսնակ Իլզե Այնգները։

Der Spiegel-ի տվյալներով՝ Ֆրիդրիխ Մերցը վերջերս սկսել է Ուրսուլա ֆոն դեր Լեյենի թեկնածությունը դիտարկել այդ պաշտոնի համար։

«Մի քանի գործոններ այս գաղափարը գրավիչ են դարձնում, օրինակ, հենց ֆոն դեր Լեյենի համար. նա արդեն ապացուցել է իրեն Բրյուսելում՝ շնորհիվ «Կանաչ գործարքի» և Ուկրաինային տրամադրված օգնության, և նրա հրաժարականը պաշտոնի իջեցում չի լինի։ Եվ նա կրկին կլինի իր տեսակի մեջ առաջինը՝ պաշտպանության առաջին նախարարը, Եվրոհանձնաժողովի առաջին նախագահը և առաջին դաշնային նախագահը», - ասվում է տեքստում։

Հաջորդ նախագահական ընտրությունները Գերմանիայում կանցկացվեն 2027 թվականին: Այս պաշտոնի թեկնածուներին առաջադրում են կուսակցություններն ու քաղաքական միավորումները, ապա ընտրում Դաշնային ժողովը՝ Բունդեսթագի անդամներից և դաշնային նահանգների պատվիրակներից կազմված հատուկ մարմին: Այսպիսով, պետության ղեկավարը չի ընտրվում անմիջապես ժողովրդի կողմից, այլ հատուկ մարմնի կողմից: