Արսեն Թորոսյանի պատգամավորական լիազորությունները դադարել են

ԱԺ նախագահը ստորագրել է Արսեն Թորոսյանի՝ պատգամավորի լիազորությունները դադարեցնելու վերաբերյալ արձանագրությունը։

«Հիմք ընդունելով պատգամավորի հրաժարականի մասին դիմումը և առաջնորդվելով «Ազգային ժողովի կանոնակարգ» սահմանադրական օրենքի 154-րդ հոդվածի 1-ին մասի 6-րդ կետի և 155-րդ հոդվածի 2-րդ մասի 2-րդ կետի պահանջներով՝ դադարած համարել «Քաղաքացիական պայմանագիր» կուսակցության համապետական ընտրական ցուցակով ընտրված պատգամավոր Արսեն Թորոսյանի՝ պատգամավորի լիազորությունները»,- նշված է Ալեն Սիմոնյանի ստորագրած արձանագրության մեջ:

Արսեն Թորոսյանը պատգամավորական մանդատը վայր դնելու մասին դիմում էր ներկայացրել օգոստոսի 20-ին: Ավելի ուշ ՀՀ վարչապետ Նիկոլ Փաշինյանը հայտնել էր, որ Արսեն Թորոսյանը կնշանակվի ՀՀ աշխատանքի և սոցիալական հարցերի նախարար: