«Նիկոլ Փաշինյանի վախերը Թուրքիայից և Ադրբեջանից դատապարտելի չեն»․ Թաթուլ Հակոբյան

Այսօր, 11:06

Լրագրող Թաթուլ Հակոբյանի ֆեյսբուքյան գրառումը․ «Հայաստանի վարչապետ Նիկոլ Փաշինյանի՝ Չինաստան նախորդ՝ 2019 թվականի մայիսին կատարած այցից մի դրվագ եմ ուզում ներկայացնել, որն ինձ պատմեց պատվիրակության անդամներից մեկը, որի անունը, բնականաբար, չեմ կարող տալ:
Պեկինից վերադարձի ճանապարհին օդանավը վայրէջք կատարեց Ալմաթիում՝ լիցքավորվելու նպատակով: Մոտ մեկ ժամ սուրճ, թեյ էինք խմում օդանավակայանի ՎԻՊ տարածքում, զրուցում:
Երբ Փաշինյան-Սի Ծինփին բանակցությունների մասնակից հայ պատվիրակին հարցրեցի որոշ մանրամասներ պատմել, նա ասաց հետևյալը, որի էությունը շարադրում եմ ներքո:
Փաշինյանը հանել է քարտեզ, փռել սեղանին և Չինաստանի առաջնորդին բացատրել Հայաստանի աշխարհագրական դիրքը, մասնավորապես, որ Հայաստանը դեպի Չինաստան ճանապարհին պատնեշ է թյուրքական աշխարհի դեմ:
Սա զորիբալայանական մոտեցում է, որ կրում էր ՀՀ վարչապետը նախքան մեր աղետալի պարտությունը: Սա այն մոտեցումն է, որ մինչև հիմա կրում եմ շատ հայ գործիչներ, քաղաքական ուժեր և անհատներ, այն է՝ Հայաստանը սեպ է թյուրքական աշխարհի ճանապարհին դեպի Ռուսաստան, Չինաստան ու Իրան ծավալման դեմ: Այս ռոմանտիկ կուրության կրողներից մեկն էլ պարոն Փաշինյանն էր:
Այսօր, երբ լսում եմ ՀՀ վարչապետի տեքստերը, զգում եմ, թե ինչքան է փոխվել Թուրքիայի հարցում: Եթե պատկերավոր ասեմ՝ Փաշինյանը իջել է Արարատի գագաթից ու բարձրացել Արագածի գագաթ ու չի ուզում անգամ նայել դեպի Բիբլիական լեռը:
Վախը սարսափելի բան է:
Այս դեպքում պարոն Փաշինյանի վախերը Թուրքիայից ու Ադրբեջանից դատապարտելի չեն: Գոնե ինձ համար»:

Աղբյուրը` Թաթուլ Հակոբյան