«Դիվանագիտության մեջ չի եղել այսպիսի գյուտ, որն արել է Փաշինյանը՝ տալ ամեն ինչ, չստանալ ոչինչ»․ Լևոն Զուրաբյան

ՀԱԿ փոխնախագահ Լևոն Զուրաբյանը ֆեյսբուքյան էջում գրել է․ «Աշխարհի պատմության մեջ չի եղել այսպիսի գյուտ, որն արել է Նիկոլ Փաշինյանը դիվանագիտության մեջ. տալ ամեն ինչ և չստանալ ոչինչ:
Օգոստոսի 8-ին ստորագրած փաստաթղթերը, հակառակ իշխանության պնդումների, ո՛չ խաղաղություն են հաստատում, ո՛չ էլ Հայաստանը դարձնում տրանսպորտային հաբ (հանգույց), չնայած Փաշինյանը համաձայնեց վերջնականապես հանել Արցախի խնդիրը միջազգային քաղաքականության օրակարգից և Ադրբեջանին տրամադրել «Զանգեզուրյան միջանցքը»:
Անունը դնես «խաղաղության խաչմերուկ», թե «Թրամփի ուղի (TRIPP)», բովանդակությունը՝ միակողմանի ձեռքբերումն է Ադրբեջանի համար՝ «Զանգեզուրյան միջանցքի» տեսքով:
Տևական և կայուն խաղաղության բանալին՝ աշխարհաքաղաքական մեծ խաղացողների շահերի ներդաշնակեցումն է՝ միջազգային կոնսորցիումի ստեղծման և երկաթուղային խաչմերուկի կառուցման միջոցով, «Արևմուտք-Արևելք» երկաթուղու հետ հանդերձ՝ կառուցելով «Հյուսիս-Հարավ» երկաթուղին:
Վերջինիս նախագիծը գոյություն ունի և կարժենա 3.2 միլիարդ դոլար, ընդ որում՝ 2019 թվականին Չինաստանն առաջարկում էր տրամադրել այդ գումարը Հայաստանի պետական երաշխիքների դիմաց, բայց Փաշինյանն անձանբ տապալել է դրա իրագործումը: Շուտով կհրապարակենք այդ նախագծի մանրամասները»:

Զուրաբյանը գրառմանը կից հրապարակել է «Եվրոմեդիա24»-ին տված իր հարցազրույցը՝ «Կհրապարակենք երկաթուղային խաչմերուկի ստեղծման ծրագիրը, որը կբացի խաղաղության ճանապարհը» վերնագրով։