Իրավապահներին հրահանգ է իջեցվել. «Հրապարակ»

«Հրապարակ»-ը գրում է. «Գործարար, բարերար Սամվել Կարապետյանի նախաձեռնությամբ հիմնադրված «Մեր ձևով» ժողովրդական շարժման հիմնադիրները, անդամները մարզերում, համայնքներում ակտիվ խմբեր են ձևավորում, փնտրում-հավաքագրում են մարդկանց: Ամենուր 4-5 հոգանոց խմբեր են ձևավորվում, որոնք փորձելու են շարժումն առավել մասշտաբային դարձնել։ Համացանցում շուրջօրյա գովազդ է միացված, որը կոչ է անում մարդկանց միանալ «Մեր ձևով» շարժմանը:
Բնականաբար, նաև գրասենյակներ են վարձում, քննարկումներ, հավաքներ են կազմակերպվում, մարդկանց են նաև աշխատանքի ընդունում կամ նրանց նվազագույն ծախսերը հոգում՝ նման գործընթացն առանց ֆինանսների հնարավոր չէ իրականացնել: Մեր տեղեկություններով, իրավապահներին հրահանգ է իջեցվել կրնկակոխ հետեւել այս ամբողջ գործընթացին, «նստել» այդ մարդկանց «պոչին», վարույթներ հարուցել, մարդկանց նկատմամբ մեղադրանքներ առաջադրել: Մի խոսքով, հնարավորինս հնչեղ շոուներ բեմադրել՝ ամեն գնով նոր քաղաքական ուժի ձևավորմանը խոչընդոտելու համար»: