«Տպավորություն է, որ մեկ անձի թատրոնի ենք ականատես»․ Արծվիկ Մինասյան

«Տպավորություն է, որ մեկ անձի թատրոնի ենք ականատես։ Իշխող քաղաքական ուժն ինքն իրեն հակասում է․․․ Կառավարության ղեկավարը հենց նոր ինքն իրեն հերքեց՝ ասելով, որ խաղաղություն է եկել, բայց նաև ընդունելով, որ Ադրբեջանի հանցագործ նախագահը կարող է իրեն թույլ տալ օգտագործել ցանկացած բառապաշար»,- այս մասին ԱԺ-ում կառավարության հետ հարցուպատասխանի ժամանակ ասաց «Հայաստան» խմբակցության քարտուղար Արծվիկ Մինասյանը՝ նաև Նիկոլ Փաշինյանից հետաքրքրվելով՝ հայ-ամերիկյան հուշագրում ի՞նչ կա։

«Ինչ ասես՝ կարող են ասել, բայց գետնի վրա արտահայտվելու է այն, ինչ-որ գրված է թղթի վրա։ Հիմա ամենատարբեր մեկնաբանություններ կան․․․ Ցանկացած մեկնաբանություն պետք է տեղավորվի 5 բառի մեջ, այդ 5 բառերը հետևյալն են՝ տարածքային ամբողջականություն, ինքնիշխանություն, իրավազորություն, փոխադարձություն, սահմանների անձեռնմխելիություն․․․ Ցանկացած բան, որ այս շրջանակից դուրս է, ինչ անուն էլ ունենա, եթե նույնիսկ անունը լինի «շնորհավոր Ամանավոր», դա մեզ համար քննարկելի չէ։ Սա է մեր դիրքորոշումը։ Դա ստորագրված փաստաթուղթ է»,- նշեց Փաշինյանը՝ խոսելով Վաշինգթոնում ստորագրված հուշագրի մասին։