«Սա լավ մշակված նախընտրական քայլ է». Գեղամ Մանուկյան

«Շատ լավ մշակված նախընտրական քայլ է սա»,- լրագրողների հետ զրույցում ասաց «Հայաստան» խմբակցության պատգամավոր Գեղամ Մանուկյանը՝ անդրադառնալով ծառայության ժամկետը 1,5 տարի դարձնելու նախագիծին։ «Շատ լավ է, որ կառավարությունը նախատեսում է 1,5 տարի դարձնել ծառայությունը, բայց բոլորիս համար էլ պարզ է, որ սա շատ լավ մշակված նախընտրական քայլ է։ Հիշում եմ, մոտ 10 ամիս առաջ ԱԺ-ում հարց ու պատասխանի ժամանակ, երբ հիշեցրեցի Սուրեն Պապիկյանին, որ տարիներ շարունակ խոսում են ծառայության ժամկետը կրճատելու մասին և մինչև հիմա չեն իրականացրել, պաշտպանության նախարարն այն ժամանակ ասում էր, որ անվտանգային խնդիրներ կան։ 2-րդ դրվագը դա Նիկոլ Փաշինյանի այդ կեղծ թեզն է, թե տեսեք, խաղաղություն է։ Փորձում են դա նաև այս սոուսի մեջ տեղավորել»,- պարզաբանեց ընդդիմադի պատգամավորը։

«Նման արմատական փոփոխության դեպքում պետք են լուրջ հիմնավորումներ, վերլուծություններ, ստատիստիկա։ Այս նախագծի հապճեպությունն այն է, որ երբ որևէ օրենք մշակում են, ուսումնասիրում են՝ պետք է հաշվի առնել, թե այս օրենքը ինչ կապ ունի մնացած օրենքների հետ, և փոփոխությունների փաթեթով են բերում։ Մյուս հարցը, որ ասում եմ այն է, որ այսօր ԶՈՒ-ում ծառայում են հազարավոր մեր հայրենակիցները, և այս օրենքը մշակող մարդը պետք է մի կետ ավելացներ․ օրենքը տարածվում է զինված ուժերում այս թվականից զորակոչված, այսօր ծառայած զինվորների վրա»,- ասաց Գեղամ Մանուկյանը։