«Թող դադարեցնեն բռնությունը, տեսնենք՝ քանի՞ ժամ կմնա իշխանության»․ Իշխան Սաղաթելյան

«Մենք իշխանության հետ չենք կարող մրցակից լինել ստի, կեղծիքի, սրիկայության, նման բոլոր բնագավառներում, բայց երկիրը ստեղծված իրավիճակից դուրս բերելու իմաստով իրենք ասելիք չունեն»,- ճեպազրույցի ժամանակ ասաց «Հայաստան» խմբակցության պատգամավոր Իշխան Սաղաթելյանը։
«Անընդհատ ասվում է՝ ժողովուրդը թող հեղափոխություն անի, թող 24 ժամ իր ուժային կառույցները դադարեցնեն մարդկանց նկատմամբ բռնությունները, ապօրինությունները, տեսնենք ինքը դրանից հետո քանի՞ ժամ կմնա իշխանության։ Այսինքն՝ գիշեր-ցերեկ ամբողջ ուժային համակարգը ամենամեծ սրիկայություններով, ձերբակալություններով, ապօրինի քայլերով ու գործողություններով մարդկանց բանտարկի, ճնշի, աշխատանքից ազատի, գործ հարուցի ու հետո էլ ասեն ժողովուրդը հեղափոխություն չի անո՞ւմ»,- ասաց Սաղաթելյանը։