«Պետք է փակենք թշնամության էջը, հնարավորություն ունենք հարևանների հետ առևտուր անելու, շփվելու»․ Վահե Ղալումյան

«Եթե խաղաղություն կա, դրա մասին չխոսենք, ասենք պատերա՞զմ է»,- այս մասին «24Նյուզ»-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Վահե Ղալումյանը՝ անդրադառնալով հարցին, թե արդյոք չափազանցված չէ հայտարարությունը, թե խաղաղությունն արդեն հաատատվել է։

«Մենք խաղաղության մեջ ենք ապրում, տևական ժամանակ է՝ մեր սահմանին կրակոցներ չկան, զոհեր չկան»,- նշեց Ղալումյանը՝ հավելելով, որ նախաստորագրված պայմանագրի պայմաններում հավանական է, որ կնճռոտ հարցերը խաղաղ կլուծվեն։
Խոսելով Ադրբեջանի հետ առևտուր անելու վերաբերյալ իշխանական օրակարգից՝ Ղալումյանը նշեց. «Ճանապարհների ապաշրջափակման և խաղաղության պայմանագրի կնքման հիմքը, էությունը առևտուրը և շփումներն են։ Տասնյակ տարիներ մեր պետությունը, մեր տնտեսությունը մեկուսացված է եղել, մի կերպ հարատևել ենք, և այսօր հնարավորություն կա մեր հարևանների հետ հարևանություն անենք, առևտուր անենք։ Մենք պետք է փակենք թշնամության էջը, փորձենք հարևանների հետ հարևանների պես շփվել»,- նշեց Ղալումյանը՝ հավելելով՝ երաշխավորված ոչինչ չեմ ասում, թե ինչ է լինելու, բայց պետք է գնալ այդ ճանապարհով։