«2022-ի հերոսների զոհաբերությունը պատգամ է՝ ապագան կառուցել ճշմարիտ դաշնակիցների հետ»․ Արման Բաբաջանյան

ԱԺ նախկին պատգամավոր Արման Բաբաջանյանի գրառումը. «2022 թվականի սեպտեմբերի 13-ին վերստին բացահայտվեց դարավոր պատրանքի ողբերգական կեղծիքը․ Ռուսաստանը, որը Հայաստանի «ռազմավարական դաշնակից»-ն էր և մի քանի պայմանագրերով ստանձնել էր մեր անվտանգության երաշխավորի դերը, սառնասրտորեն դավաճանեց մեզ։ Ռուս սահմանապահները դավաճանաբար լքեցին իրենց վստահված սահմանները, լռությամբ արդարացրին Ադրբեջանի լայնածավալ ագրեսիան և այդպիսով բացահայտեցին իրենց իրական նպատակը՝ Հայաստանը թուլացնելով պահել մշտական կախվածության ու վասալության մեջ։
Այդ նույն պահին Ամերիկայի Միացյալ Նահանգները, չունենալով որևէ դաշնակցային պարտավորություն Հայաստանի հանդեպ, իրեն դրսևորեց որպես իսկական բարեկամ: ԱՄՆ-ի քաղաքական ու դիվանագիտական աջակցությունը ցույց տվեց, որ իրական դաշնակցությունը չի ծնվում պայմանագրերից ու ստորագրություններից, այլ բխում է արժեքներից, սկզբունքներից և ազատության գիտակցումից։
Սեպտեմբերի 13-ին նահատակված մեր ավելի քան երկու հարյուր հերոսների արյունը դարձավ այն անխախտ սահմանագիծը, որից անդին Հայաստանն այլևս չի կարող և իրավունք չունի վերադառնալ հին պատրանքներին․ նրանց զոհաբերությունը մեր ժողովրդի վրա դրված հավերժական պատգամ է՝ կառուցել ապագան ազատության, արժանապատվության և ճշմարիտ դաշնակիցների հետ։
Փառք մեր հերոսներին․ նրանց արյունով գծված սահմանագիծը հավիտյան վկայում է, որ Հայաստանի ապագան կարող է կերտվել միայն ազատության և արժանապատվության ուղով»։