«Իհարկե գնալու եմ Սրբազանի դատին»․ Սպարտակ Ղուկասյան

«Չե՞ն վախեցրել ձեզ այս քայլով. որ տնային կալանքից դուրս գաք, էլի գնալո՞ւ եք Սրբազանի դատին»,- հարց ուղղվեց Գյումրու քաղաքապետ Վարդան Ղուկասյանի որդուն՝ Սպարտակ Ղուկասյանին՝ իր գործով դատական նիստից առաջ: Սպարտակ Ղուկասյանը պատասխանեց․ «Իհարկե գնալու եմ, ումի՞ց պիտի վախենամ, իրենք պետք է վախենան, մենք վախենալու բան չունենք»։

Հիշեցնենք, օրեր առաջ, երբ որդուն ձերբակալել էին, Վարդան Ղուկասյանն ասել էր. ««Դե ես գիտեի, որ այդպես պիտի լինի, որովհետև երբ եպիսկոպոսի (Շիրակի թեմի առաջնորդ Միքայել արքեպիսկոպոս Աջապահյանի-խմբ.) դատին գնաց, մասնակցեց, ինձ մարդիկ ասեցին, թե «պարոն Ղուկասյան, իրեն կկալանավորեն»: Ասի՝ ինչի՞, բա՝ էդպես է: Ու չէի հավատում, ճիշտն ասած, իրոք չէի հավատում, բայց էսօր ցայտուն երևաց, որ շատ հիշաչար մարդկանց հետո գործ ունենք: Ուղեղիս մեջն էլ չի մտնում, թե ինչի համար, ոնց»»:

Հիշեցնենք՝ օրեր առաջ Սպարտակ Ղուկասյանին ձերբակալել էին շորթման մեղադրանքով: Դատարանը որպես խափանման միջոց նրա նկատմամբ կիրառել էր երկամսյա տնային կալանքը։