«Շինծու գործ է․ դատախազը ծառայություն է մատուցում քաղաքական իշխանությանը»․ Արծվիկ Մինասյան

«Սա վերից վար շինծու գործ է՝ իրավունքի հետ բացարձակ կապ չունեցող, ավելին՝ մեղադրանքը պարունակում է ձևակերպումներ, որոնք մասնագիտական տեսանկյունից որևէ քննադատության չեն դիմանում»,- այս մասին լրագրողների հետ զրույցում նշեց ԱԺ «Հայաստան» խմբակցության պատգամավոր Արծվիկ Մինասյանը՝ իր և Սեյրան Օհանյանի գործով դատական նիստից առաջ։
«Այս մարդիկ անգամ չգիտեն նախարարի լիազորություններն ու պարտականությունները, տարրական տվյալների չեն տիրապետում, և գլխավոր դատախազն էլ ԱԺ-ում կեղծ տեղեկություններ էր հրապարակում․․․ Իմ հասցեին հնչող մեղադրանքները բացարձակ առնչություն չունեն իրականության և իրավունքի հետ։ Անհասկանալի է, թե ինչ են ուզում ապացուցել։ Այն, ինչ ներկայացվում է դատարանում, փորձ է վարկաբեկել մարդկանց, ստեղծել պատկեր, թե իբր խախտվել են օրենքներ։ Այսպիսի մեղադրանք կարող են առաջադրել ցանկացած աշխատողի․ գործողություն ես անում ի շահ պետության, էլի մեղադրանք է առաջադրվում։ Այս ամենը վկայությունն է նրա, որ գլխավոր դատախազը հանձնարարություն է ստացել կամ ինքնուրույն որոշել է ծառայություն մատուցել քաղաքական իշխանությանը և նման ցածրակարգ մեղադրանքով փորձում է մարդկանց մոտ տպավորություն ստեղծել»,- նշեց Մինասյանը։

Հիշեցնենք՝ Արծվիկ Մինասյանին ու Սեյրան Օհանյանին դատախազությունը մեղադրանք է առաջադրել նույն գործի շրջանակներում, որը վերաբերում է Գեղարքունիքի մարզի Դրախտիկ համայնքի տարածքում Սեյրան Օհանյանի կողմից հողատարածք ձեռք բերելուն: