«Քոնգրեսում խորհրդարանականները կողմ են քվեարկել հայանպաստ նախագծին»․ Գևորգ Ղուկասյան

ՀՅԴ Հայ դատի կենտրոնական գրասենյակի հատուկ ծրագրերի պատասխանատու Գևորգ Ղուկասյանը ֆեյսբուքյան իր էջում գրել է․ «ԱՄՆ կոնգրեսում խորհրդարանականները խախտում են սեփական կուսակցության ներքին որոշումը և կողմ քվեարկում հայանպաստ նախագծին, մի բան, որ անգամ ՀՀ Ազգային ժողովում է անհնար պատկերացնել։
Այսօր առավոտյան Հայ դատի Ամերիկայի հանձնախմբից կարևոր լուր էինք ստացել․ ԱՄՆ Ներկայացուցիչների պալատի արտաքին հարաբերությունների հանձնաժողովն այսօր ընդունել է Հայ դատի Ամերիկայի հանձնախմբի կողմից աջակցվող փոփոխությունը՝ «2026թ․ պետդեպարտամենտի լիազորությունների մասին օրինագծում», որը պարտադրում է պետդեպարտամենտին ապահովել հայ ռազմագերիների ազատ արձակումը, պաշտպանել Արցախի հայկական կրոնական և մշակութային ժառանգությունը, աջակցել Արցախի տեղահանված հայերի վերադարձի իրավունքի իրացմանը։
Մեկ այլ օրինագիծ, որ ներկայացվել էր մեր լավ բարեկամ Բրեդ Շերմանի կողմից և վերաբերում էր 907-րդ բանաձևի խուսանավման նախագահական իրավասության սահմանափակմանը, ցավոք մերժվեց ձայների 26-24 հարաբերակցությամբ։
Այստեղ ուշագրավը սակայն ինչն է, նախագծին, որ ստացավ արտաքին հարաբերությունների մշտական հանձնաժողովի բոլոր դեմոկրատ անդամների հավանությունը, միացան նաև հանրապետական կոնգրեսականներ Մայքլ Լոուլերը և Քրիս Սմիթը, ովքեր խախտեցին սեփական կուսակցական դիրքորոշումը և աջակցեցին փոփոխությանը։
Պատկերացնո՞ւմ եք, ԱՄՆ կոնգրեսում խորհրդարանականները խախտում են սեփական կուսակցության ներքին որոշումը և կողմ քվեարկում հայանպաստ նախագծին»։