«Երրորդ Հանրապետության ձախողման պատասխանատվությունն ու մեղքը Փաշինյանինն է». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Նիկոլ Փաշինյանը՝ Երրորդ և Չորրորդ Հանրապետության կամ Արարատի ու Արագածի միջև․
Հայաստանի վարչապետ Նիկոլ Փաշինյանի հայտարարությունը Չորրորդ Հանրապետության մասին չափազանց ուշագրավ է պատմության և պատասխանատվության տեսանկյունից:
Չորրորդ Հանրապետության մասին ես գիտեմ առնվազն երկու մարդու, ովքեր հրապարակային են գրել դեռ մոտ մեկ տարի առաջ: Բայց սա չէ էականը:
Երբ վարչապետ Փաշինյանը հայտարարում է Չորրորդ Հանրապետության մասին, դա նշանակում է, որ այլևս չկա Երրորդ Հանրապետությունը:
Իսկ եթե չկա Երրորդ Հանրապետությունը, դա նշանակում է, որ այն վերջացել է, այն այլևս գոյություն չունի, եթե կուզեք՝ մահացել է, անցել պատմության գիրկը, ինչպես Առաջին Հանրապետությունը, ինչպես Կիլիկյան Հայաստանը, ինչպես Բագրատունիների Հայոց թագավորությունը:
Ու միանգամից հարց է գալիս՝ իսկ ո՞վ և ովքե՞ր են սպանել Երրորդ Հանրապետությանը:
Ով է պատասխանատու կամ ովքեր են պատասխանատու:
Չեմ բացառում, որ սկսվի մի ահավոր պայքար Երրորդ Հանրապետության դեմ, որպեսզի նրա մահվան պատասխանատուն կամ պատասխանատուները խուսափեն կամ փորձեն խուսափել արդարադատությունից, որովհետև եթե Երրորդ Հանրապետությունը շատ վատ բան էր, ապա պատասխանատվությունն ու պատիժը հանրային ընկալման տեսանկյունից կարող է մեղմացուցիչ լինել:
Սա քննարկման լուրջ, խորքային թեմա է, որքան էլ որ այն հնչեցվի որպես քաղաքական տեքստ:
Բայց մի ավելի կարևոր բան կա:
Եթե պարոն Փաշինյանը կարողանա Չորրորդ Հանրապետությունը պահել 29,743 քառակուսի սահմաններում, ապա ես, որպես մեր պատմության հետազոտող լրագրող, շատ մեղմ և արդարամիտ կլինեմ նրա նկատմամբ: Դա կհամարեմ զարմանահրաշ նվաճում:
Երրորդ Հանրապետության ձախողման պատասխանատվությունն ու մեղքը համարում եմ վարչապետ Փաշինյանինը: Ոչ միայն նրանը, բայց հիմնականում նրանը, որովհետև Երրորդ Հանրապետությունը իր գոյությունը դադարեցրել է նրա կառավարման ժամանակ»: