«Փաշինյանը նոր «ընկերներ» է փնտրում՝ ի դեմս Ադրբեջանի և Թուրքիայի». Նարեկ Կարապետյան

«Այսօր Հայաստանի վարչապետը մի քանի հայտարարություն է արել, որից մեկը կապված է խաղաղության հետ։ Նա ասել է, որ բերում է խաղաղություն Հայաստանին, սակայն մոռացել է ասել, որ նա այդ խաղաղությունը բերում է 3 պատերազմ հետո»,-ֆեյսբուքյան տեսանյութում նշել է «Մեր ձևով» շարժման համակարգող Նարեկ Կարապետյանը՝ արձագանքելով Նիկոլ Փաշինյանի՝ ՔՊ-ի համաժողովի ժամանակ հնչեցրած հայտարարություններին։

Կարապետյանն ընդգծել է, որ Փաշինյանի իշխանության ժամանակաշրջանում է եղել Հայաստանում ամենաշատ պատերազմները և նրա բանակցային ոճն է, որ բերում է պատերազմներ։

«Փաշինյանը բանակցային կարողություններ չունի: Նա փչացրել է հարաբերությունները ՌԴ-ի հետ, Վրաստանի Հանրապետության վարչապետի հետ, ինչի մասին մեր հասարակությունը չգիտի, և հիմա փնտրում է նոր «ընկերներ»՝ ի դեմս Ադրբեջանի և Թուրքիայի։ Սակայն նա գիտի, կամ չգիտի, որ նրանք մեզ ընկեր երբեք չեն կարող լինել, մեզ օգտագործելու են այս ամբողջ պրոցեսի մեջ ու վերջում ասեն՝ Փաշինյանն այս թուղթը ստորագրել է, ստիպված եք անել»,-ասել է նա: