«Թուրքիան ՀՀ-ն կկապի ամբողջ Եվրոպայի հետ»․ թուրք պատգամավոր

««Թրամփի ուղին» շատ կարևոր է առևտրի և հարաբերությունների կարգավորման գործընթացում»,- լրագրողների հետ զրույցում ասաց թուրք պատգամավոր Ֆաթմա Աքսալը։ «Հայաստանը և Թուրքիան ունեն փոխլրացնող հնարավորություններ տարբեր ոլորտներում, և այդ ներուժի օգտագործումը կարող է նպաստել երկու երկրների և ողջ տարածաշրջանի զարգացմանը»,- ասաց Աքսալին։

«Հայաստանը որոշ ոլորտներում ունի առավելություններ, Թուրքիան՝ այլ։ Առևտրից շահում են բոլորը։ Մենք հարևաններ ենք և պատմական կապեր ունենք։ Թուրքիայում ապրում են Հայաստանի քաղաքացիներ, և մենք նրանց հետ լավ հարաբերություններ ունենք։ Ես հավատում եմ, որ երկու երկրները, Հարավային Կովկասի ողջ տարածաշրջանը միայն կշահեն խաղաղությունից»,– ասաց Աքսալին՝ հավելելով․ «Թուրքիան Հայաստանը կկապի ամբողջ Եվրոպայի հետ։ Հայաստանը ցանկանում է անդամակցել Եվրոպական միությանը։ Մենք ԵՄ անդամ չենք, բայց մենք խաչմերուկ ենք Հայաստանի և Եվրոպայի միջև, և դա կարող է մեծապես օգնել։ Բացի այդ, Հայաստանը կարող է դառնալ տարանցիկ կետ էներգետիկ ոլորտում, օրինակ՝ գազի մատակարարման համար»,- նշեց նա։