«Лягушка путешественница»-ի նման իրեն շպրտելու է բոլոր հնարավոր լափամանները՝ իշխանությունը երկարաձգելու համար». Նաիրա Զոհրաբյան

«Նիկոլը, ի տարբերություն իր որոշ թիմակիցների, ապուշ չէ, շատ լավ հասկանում է, որ դավաճանի խարանն ինքն իր ճակատից չի մաքրելու»,- այս մասին «Եվրոմեդիայի» եթերում նշեց հասարակական-քաղաքական գործիչ, ԱԺ նախկին պատգամավոր Նաիրա Զոհրաբյանը՝ Նիկոլ Փաշինյանի՝ սոցիալական ցանցերում զետեղած գրառումները համարելով «անզուսպ և անդաստիարակ գռեհկաբանություններ»։

«Նիկոլ Փաշինյանը սերիական ստախոս է։ Ստում է, երբ որ ասում է, թե Արցախը հանձնվել է մինչ իր իշխանության գալը։ Նիկոլ Փաշինյանը փորձում է երեք նախագահներին ներքաշել էժանագին մի դիլեմայի մեջ, որտեղ, իր կարծիքով, հաղթելու է իր մանիպուլյացիաներով և լաչառությամբ, բայց չի հաղթելու, որովհետև կան անհերքելի փաստեր, կա նաև ԵՄ բարձրաստիճան պաշտոնյայի խոստովանությունը, որ Նիկոլ Փաշինայանն առաջին հայ պաշտոնյան է, որը պաշտոնապես Պրահայում Արցախը ճանաչել է Ադրբեջանի կազմում։

Այն, որ Փաշինյանը չի հանգստանում, անընդհատ նողկալի գրառումներ է անում երկրի ղեկավարների հասցեին, վկայում է ոչ թե Փաշինյանի ուժի, այլ թուլության մասին, սեփական պարտությունը և սեփական կապիտուլյացիան գիտակցելու մասին,- նշեց Զոհրաբյանը։

Անդրադառնալով հայտարարություններին, թե այսուհետ ՆԱՏՕ-ն կարևորագույն և հիմնական հարթակն է՝ «խաղաղության օրակարգն» առաջ տանելու և հետագա բանակցությունների համար, Զոհրաբյանն ընդգծեց․ «Նիկոլը «лягушка путешественница»-ի նման իրեն շպրտելու է բոլոր հնարավոր լափամանները, որտեղ կտեսնի իր իշխանությունը ևս մի տարով, հետո նորից ձգձգելու հնարավորություն։ Պետք լինի, գնալու է Պուտինի մոտ երգի՝ Боже, Царя храни, պետք լինի՝ Թրամփին պաչիկներ ու սրտիկներ է ուղարկելու»։