«Պաշտպանական բյուջեի կրճատումը վտանգավոր փոփոխություն է»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Պաշտպանական բյուջեն շուրջ 15 տոկոսով կրճատելու կառավարության որոշումը ռազմավարական շեղում է, վտանգավոր փոփոխություն, որը սպառնում է Հայաստանի պետականությանը։ Պաշտպանությունը միայն սահմանների պաշտպանություն չէ․ այն պետության կենսունակության, ինքնիշխանության և զարգացման առանցքն է։ Երբ աշխարհում բոլոր ուժային կենտրոնները՝ ԱՄՆ-ը, Ֆրանսիան, Լեհաստանը, Գերմանիան, իսկ նույնիսկ փոքր պետություններն՝ Էստոնիան ու Սինգապուրը, արագ միլիտարիզացնում են իրենց տնտեսությունները, վերակառուցում արդյունաբերությունը և ձևավորում նոր տեխնոլոգիական դաշինքներ, Հայաստանը չի կարող թույլ տալ իրեն այսպիսի կրճատում։
Պաշտպանական համակարգը միայն ծախս չէ․ դա ազգային անվտանգության, տնտեսության, գիտության ու տեխնոլոգիաների շարժիչ ուժն է։ Բանակի կարիքների համար պետական պատվերները զարգացնում են արդյունաբերությունը, խթանում գիտահետազոտական աշխատանքները, ստեղծում նոր շուկաներ ու բարձր վարձատրվող աշխատատեղեր։ Եթե մենք կրճատում ենք պաշտպանությունը, մենք ոչ միայն թուլացնում ենք մեր ռազմական ներուժը, այլև զրկում ենք մեզ տեխնոլոգիական ինքնիշխանությունից, տնտեսական աճից և արտաքին քաղաքական սուբյեկտայնությունից։
Այս որոշումը մեզ հեռացնում է կենսունակ պետության մոդելից։ Եթե Հայաստանը ուզում է լինել ուժեղ, ինքնուրույն և մրցունակ, ապա բանակը պետք է դառնա ոչ թե բյուջեի մի շարք, այլ պետական համակարգի սիրտը՝ միավորելով անվտանգությունը, տեխնոլոգիան, կրթությունը և տնտեսությունը մեկ միասնական ռազմավարության մեջ։
Պաշտպանությունը չի կրճատվում․ այն կամ դառնում է ազգային ուժի առանցքը, կամ պետությունը դադարում է գոյություն ունենալ որպես սուբյեկտ»։