«Եթե դու իրազեկված ես, ինչո՞ւ չի ապահովվել ընդդիմադիր գործչի անվտանգությունը»․ Գոհար Մելոյան

«Փարաքարի համայնքապետ Վալոդյա Գրիգորյանն այն գործիչն էր, ում հաջողվեց ջախջախիչ հաղթանակ տանել իշխանության նկատմամբ․․․ Պետք է ընդունենք, որ տեղի ունեցածը գործող իշխանության պատասխանատվության տիրույթում է գտնվում»,- «168Ժամ»-ի հետ զրույցում այս տեսակետը հայտնեց սահմանադրագետ Գոհար Մելոյանը՝ անդրառնալով Փարաքարի համայնքապետ Վալոդյա Գրիգորյանի սպանությանը։

«Առավել ևս այդ պատասխանատվությունն ընդգծվեց ՀՀ վարչապետ Նիկոլ Փաշինյանի գրառումով, որ վենդետաները («բռնությունների շարքը»- խմբ․) պետք է կանխվեր։ Այսինքն՝ միջադեպից ժամեր անց վարչապետին հայտնի՞ է եղել տեղեկատվություն, որ հնարավոր է եղել ինչ-որ վենդետա, և իրենք չե՞ն կանխարգելել ու չե՞ն ապահովել ընդդիմադիր գործչի անվտանգությունը․․․ Եթե դու առաջին դեմքի մակարդակով իրազեկված ես հնարավոր հետևանքային պրոցեսների մասին, ինչո՞ւ չի ապահովվել ընդդիմադիր գործչի անվտանգությունը. արդյոք դա դիտավորությո՞ւն էր, նպատակահարմարությո՞ւն էր, ցանկալի հետևա՞նք էր»,- նշեց Մելոյանը։

Նրա խոսքով՝ զուգահեռ իրականության մեջ տեսնում ենք, որ բազմաբնակարան շենքի պատուհաններից խնձոր նետողին անմիջապես կարող են հանտնաբերել, մթության մեջ իշխանահաճո գործչի ուղղությամբ դատարկ շիշ նետողին ամբոխի միջից անմիջապես գտնել․․․, բայց այս իրավիճակում ո՛չ կանխարգելում է տեղի ուեցել, ո՛չ բացահայտում։ «Արդյո՞ք դա չի տեղավորվում նպատակահարմարության դաշտում, թե որ բնույթի գործերը պետք է բացահայտվեն, որոնք՝ ոչ»,- հավելեց Մելոյանը։