«Կառավարության ծրագրի ձախողման դեպքում ԱԺ իրավունքն է պատասխան պահանջել և անվստահություն հայտնել»․ Նաիրա Կարապետյան

«Հայաստանը պառլամենտական պետություն է, և ոչ թե պատգամավորն է վարչապետի մոտ աշխատում, այլ պատգամավորն է ընտրում վարչապետին։ Այս ԱԺ-ում է ընտրվել Նիկոլ Փաշինյանը, այստեղ է հաստատվել նրա ծրագիրը, և կառավարությունը հաշվետու է ԱԺ-ին»,- այս մասին ԱԺ-ում «Պատիվ ունեմ» խմբակցության հրավիրած «Ազգային ճգնաժամի և կառավարման ձախողման մասին» ԱԺ հայտարարության նախագծի քննարկման ժամանակ հայտարարեց ԱԺ նախկին պատգամավոր Նաիրա Կարապետյանը։

«ԱԺ-ի քաղաքական պարտականությունը և սահմանադրական իրավունքն է կառավարության՝ իր կողմից հաստատված ծրագրի ձախողման և տապալման դեպքում պատասխան պահանջել և անվստահություն հայտնել»,- նշեց Կարապետյանը և խորհրդարանական և արտախորհրդարանական ուժերին քաղաքական մեծ կոնսոլիդացիայի կոչ արեց։