«Մեր պետության ապագան դարձել է մեկ անձի իշխանասիրության գերին»․ Շիրազ Խաչատրյան

«Մեր պետության ապագան դարձել է մեկ անձի իշխանասիրության գերին»,- այս մասին ԱԺ-ում «Պատիվ ունեմ» խմբակցության հրավիրած «Ազգային ճգնաժամի և կառավարման ձախողման մասին» ԱԺ հայտարարության նախագծի քննարկման ժամանակ հայտարարեց «Հենակետ» ՀԿ-ի փորձագետ Շիրազ Խաչատրյանը։

Նրա դիտարկմամբ՝ Նիկոլ Փաշինյանի ղեկավարած իշխանությունն արդեն 7 տարի շարունակ ապացուցում է, որ ի վիճակի չէ պաշտպանել ՀՀ պետականությունն ու անվտանգությունը։

«Տպավորություն է ստեղծվել, որ պետությունը գործում է ոչ թե քաղաքացիների համախմբման, այլ պառակտման համար՝ փորձելով «բաժանի՛ր, որ տիրես» սկզբունքով պահպանել իշխանությունը։ Ամենից վտանգավորն այն է, որ Փաշինյանը ոչ միայն անընդհատ կորուստներ է բերում, այլ նաև հոգեբանորեն կոտրում է ժողովրդի ողնաշարը՝ անընդհատ քարոզելով պարտվողականություն»,- նշեց Խաչատրյանը՝ հավելելով, որ Փաշինյանին այլևս չի կարելի վստահել պետության ղեկը։