«Սեպտեմբերի 27-ը «կազմակերպվա՞ծ» պատերազմ էր, թե՞ ոչ»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Սեպտեմբերի 27-ը «կազմակերպվա՞ծ» պատերազմ էր, թե՞ ոչ:

Այս հարցի վերաբերյալ Հայաստանում գնահատականները տարբեր են: Ինձ համար այս հարցում չկա որոշակի համոզում: Բայց, իմ կարծիքն այն է, որ պատերազմը կազմակերպված չէր, այլ «հասունացել» ու «զարգացել» է աշխարհաքաղաքական իրադարձությունների բերումով: Ավելի շուտ՝ հասունացել ու զարգացել է դրա հնարավորությունը, որն էլ օգտագործվել է:

Պարտությունը, ըստ իս, եղել է պատերազմի ապաշնորհ կառավարման հետևանք: Ինչի՞ հետևանք է եղել ապաշնորհ կառավարումը: Ես այս հարցի պատասխանը չունեմ: Այո, կարող էր և լինել դիտավորության հետևանք: Սա քննությամբ պարզաբանվելիք հարց է, ինձ համար:

Ես բոլորովին այն կարծիքին չեմ, թե պատերազմի բերել է «Արցախը Հայաստան է, և վերջ» արտահայտությունը, կամ՝ «նոր պատերազմ՝ նոր տարածքներ» արտահայտությունը, կամ հուլիսյան մարտերը:

Ավելին, ես ներկայացրել եմ իմ մեկնաբանությունը, որ հուլիսյան մարտերը գնահատում եմ որպես ծավալվող խոշոր պատերազմը կանխելու մի փորձ, որը սակայն չի ստացվել:

Ես մի շարք անգամներ հիշեցրել եմ՝ 2018 թվականին Ադրբեջանը աշնանը ծրագրված նախագահի հերթական ընտրությունը տեղափոխեց նույն տարվա փետրվար, այդպիսով աշնան համար «ազատելով» իր ձեռքերը: Հայաստանում տեղի ունեցած իրադարձությունները՝ 2018-ի մայիսին, որոշակիորեն ստեղծեցին նոր իրավիճակ ու հետաձգեցին 2018-ի աշնանը ծրագրված պատերազմը: Բայց, փաստորեն երկու տարով:

Կրկնեմ, այս ամենը դույզն իսկ չի նվազեցնում պարտության ու հետագա կորուստների, այդ թվում Արցախի լիակատար կորստի համար Նիկոլ Փաշինյանի պատասխանատվությունը: Բայց ես իրադարձությունների զարգացումը գնահատում եմ վերը նշածս տրամաբանությամբ»։