«Համեմատությունը` որպես պետության առաջնորդի օրինակ». Վլադիմիր Մարտիրոսյան

Քաղաքագետ Վլադիմիր Մարտիրոսյանի ֆեյսբուքյան իր էջում տեսանյութ է հրապարակել՝ կից գրառումով․ «Սա տեղադրում եմ՝ որպես պետության առաջնորդի օրինակ, ով բացառապես հետամուտ է իր երկրի ազգային, պետական, անվտանգային և հումանիտար շահերին: Նեթանյահուն ՄԱԿ-ի ամբիոնից անուն առ անուն հիշատակում է իսրայելցի գերիներին, որովհետև դա իր ազգային պատասխանատվության և պետականության հիմքն է: Նա ցույց է տալիս, որ պետությունն իր քաղաքացիներին չի մոռանում և նրանց ազատությունը դարձնում է միջազգային օրակարգի առանցք։ Նա հիշեցնում է, որ ՀԱՄԱՍ-ի ձեռքում դեռ պահվում են 48 իսրայելցի գերիներ, որոնցից մոտ 20-ը ողջ են, բայց գտնվում են սարսափելի պայմաններում: Այնուհետև Նեթանյահուն անուն առ անուն թվարկում է այդ 20 գերիների անունները՝ շեշտելով, որ դրանք իրական մարդիկ են, ոչ թե վիճակագրություն, և դիմում է նրանց անմիջականորեն ասելով՝ «Մենք ձեզ չենք մոռացել։ Մենք պայքարում ենք ձեր ազատության համար»։ Այսպիսով աշխարհի թիվ մեկ քաղաքական ամբիոնից գերիների անունները հրապարակելով նա միաժամանակ լուծում է երեք հարց.

1. Օգտվում է միջազգային ճնշման գործիքից,
2. Տալիս է ազգային համախմբման խորը ուղերձ և նպատակ,
3. Ամրապնդում է իր քաղաքական լեգիտիմության հիմքերը՝ ըստ ազգային նպատակների։
P.S. Այս տեսանյութը տեղադրում եմ ոչ պաղեստինաիսրայելական հակամարտության քաղաքական տեսանկյունից: Մի քանի օր առաջ Հայաստանը ներկայացնողն էլ էր խոսում այդ ամբիոնից, համեմատությունները թողնում եմ ձեզ»: