«Այդ տունն ամուսնուս ընտանիքինն է»․ Էմմա Պալյանը՝ Գյումրու քաղաքապետարանի հայտարարության մասին

«Տունը, որի մասին հայտարարություն է տարածել Գյումրու քաղաքապետարանը, պատկանում է ամուսնուս ընտանիքին, ես անգամ գրանցված չեմ այնտեղ»,- «Նյուզ»-ի հետ զրույցում այսպես է արձագանքել ԱԺ «Քաղաքացիական պայմանագիր» խմբակցության պատգամավոր Էմմա Պալյանը՝ անդրադառնալով Գյումրու քաղաքապետարանի պաշտոնական էջում տարածված այն տեղեկությանը, որ Անի թաղամասի Պարույր Սևակի 13 շենքի 109 բնակարանի բնակիչներ Ալբերտ Լորիսի Մարտիրոսյանը և նրա հետ փոխկապակցված անձինք փակել են նշված շենքի առաջին հարկի շքամուտքը՝ այն ծառայեցնելով սեփական նպատակներին։

Նշենք որ Ալբերտ Մարտիրոսյանը ԱԺ «Քաղաքացիական պայմանագիր» խմբակցության պատգամավոր Էմմա Պալյանի ամուսինն է։

«Ես չգիտեմ, թե ինչ հանրային տարածք զավթելու մասին է խոսքը, դա ամուսնուս ծնողների բնակարանն է։ Տեղեկություն չունեմ, թե ինչ տարածք զավթելու մասին է խոսքը, ես ապրում եմ այլ հասցեում։ Ես ինչ ամուսնացել եմ, նրա ընտանիքին պատկանող բնակարանը տեսել եմ այնպես, ինչպես այսօր կա»,- նշել է Պալյանը։