«Նիկոլ Փաշինյանն իր բոլոր հանցանքները փորձում է փաթաթել ուրիշների վզին»․ Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը․ «Ամեն անգամ, երբ Նիկոլ Փաշինյանը կամ նրա քաղաքական ոհմակը Արցախի վաճառքի մեղավոր են համարում, ասենք, Ռոբերտ Քոչարյանին կամ նախկին մյուս ղեկավարներին' պատճառաբանելով, թե նրանք անհրաժեշտ չափով չեն պայքարել Արցախի անվտանգության համար, ես ինքնաբերաբար հիշում եմ Բերձորի թեման։
2021-ին ասում էի, որ Բերձորը չի հանձնվելու, որովհետև դա Արցախի անվտանգության միակ ճանապարհն է, այլապես եթե Բերձորը հանձնվի թշնամուն, կարճ ժամանակ անց մենք կկորցնենք ամբողջ Արցախը։
Նիկոլի քարոզչական թիմը այդ ամբողջից ֆիքսել էր միայն «Բերձորը չի հանձնվելու» միտքը և մինչև հիմա տարածում է, թե Նաիրի Հոխիկյանն է մեղավոր 2022-ին Բերձորը հանձնելու համար, որովհետև ասաց, թե չի հանձնվելու, բայց անհրաժեշտ չափով չպայքարեց ու չպահեց Բերձորը։ Մեծ թվով մարդիկ էլ հիմարաբար ուտում են այդ կորեկը։
Փաստացի մենք գործ ունենք մի իրականության հետ, երբ Նիկոլ Փաշինյանը իր բոլոր հանցանքները փորձում է փաթաթել ուրիշների վզին՝ հայ ժողովրդին համարելով հիմար և միամիտ»։