«Հանրահավաքը գուցե դառնա սթափության ու գիտակցության ռեստարտ»․ Տիգրան Դումիկյան

Քաղաքական վերլուծաբան Տիգրան Դումիկյանի ֆեյսբուքյան գրառումը․ «Հոկտեմբերի 18․ ի՞նչ են հուշում «աստղերը»․
Մեզանից շատերը, թեկուզ մեկ անգամ, հետաքրքրությամբ կամ հավատով կարդացել կամ լսել են աստղագուշակության կանխատեսումները՝ փորձելով դրանք կապել առօրյա կյանքի կամ սպասվող իրադարձությունների հետ։ Երբեմն նույնիսկ հասցրել ենք ուրախանալ կամ տխրել՝ կախված այն բանից, թե «ինչ էին հուշում աստղերը»։
Սակայն կյանքի փորձի և գիտակցության հասունացման ընթացքում առավել ակնհայտ է դառնում, որ մարդու ճակատագիրը պայմանավորված չէ աստղերի դիրքով կամ պատահական կանխատեսումներով։ Իրական զարգացման ու կայացման ուղին անցնում է հավատով՝ առ Աստված, և սեփական քայլերի նկատմամբ պատասխանատու ու գիտակցված վերաբերմունքով։
Բայց, ինչպես հայտնի մուլտֆիլմում է ասվում, «ինչ–որ բան սխալ է»։ Մեր կյանքում այսօր փորձ է արվում արհեստականորեն փոխել, ձևախեղել կամ նույնիսկ վերացնել այն արժեքները, ավանդույթներն ու հիշողությունները, որոնք դարերով ձևավորել են մեր ինքնությունը։ Այս ամենին զուգահեռ կիրառվում են տեղեկատվական հիպնոսի և հոգեբանական մանիպուլյացիայի ամենատեսական և երբեմն արգելված մեթոդները՝ ուղղված շարքային քաղաքացու գիտակցությունը վերահսկելուն ու ճնշելուն։
Այսօր՝ հոկտեմբերի 18-ին, մայրաքաղաք Երևանի սրտում՝ Ազատության հրապարակում, ժամը 16:30-ին կայանալիք հանրահավաքը գուցե շատերիս համար դառնա հենց այդ սթափության ու գիտակցության ռեստարտը։ «Աստղերն» այսօր էլ կփորձեն մեզ ինչ-որ բան «հուշել», բայց իրական լույսը մեր մեջ է, մեր խղճի, մտքի ու համարձակ որոշման մեջ։ Ուստի՝ եկեք միասին փորձենք վերադարձնել հավատը ոչ թե աստղերի, այլ մարդու, Աստծո ու հայրենիքի հանդեպ․․․ »։