«Կարևոր ֆիգուր է․ նման սկզբունքային տղեն չէր կարող լինել ազատության մեջ»․ Նորայր Հակոբյան

«Որպես իրավաբան, իհարկե, սպասելի չէր, մենք սպասում էինք արդարացման որոշման։ Բայց բոլորս հասկանում ենք, որ քաղաքական դրդապատճառներով սպասելի էր, որ նմանատիպ որոշում կլինի»,- այս մասին «Զվարթնոց» օդանավակայանում լրագրողների հետ զրույցում նշել է Մասիսի փոխքաղաքապետ Նորայր Հակոբյանը՝ հավելելով, որ նույնիսկ մեղադրական դատավճռի դեպքում պետք է լիներ նվազագույն սահմանում, ոչ թե առավելագույն։

«Հաշվի չառնելով մի շարք հանգամանքներ՝ մի կողմ դնելով գործի ոչ իրավական մասը, 4 անչափահաս երեխաների հայր լինելը, իրենց մատնանշած ժամանակահատվածից հետո վերընտրված համայնքի ղեկավար լինելը և մի շարք այլ հանգամանքներ, նրանք այնպիսի դատավճիռ կարդացին, որով զրկեցին նրան ազատությունից և դատապարտեցին 6 տարի 3 ամիս․ սա ուղղակի աբսուրդի ժանրից է»,- նշել է փոխքաղաքապետը՝ հավելելով, որ Դավիթ Համբարձումյանը քմծիծաղով ու հեգնանքով է վերաբերվում իր դեմ կայացված դատավճռին։

«Նա վստահ է, որ իր պայքարը հաջողությամբ է ավարտվելու։ Յուրաքանչյուր խելամիտ դատողություն ունեցող մարդու համար հասկանալի է, որ նրան պարզապես մեկուսացնում են առաջիկա ընտրական և քաղաքական գործընթացներից։

Դավիթ Համբարձումյանը ՀՀ-ում կարևորագույն ֆիգուր է թե՛ համապետական, թե՛ համայնքային ընտրություններում, և նման սկզբունքային տղեն չէր կարող լինել ազատության մեջ»,- հավելել է Հակոբյանը։