«Նիկոլ Փաշինյանը փորձում է Մասիսում իր թեկնածուին առաջ քաշել»․ Հենրիխ Դանիելյան

«Մեր ներկայությունը դատարանների առջև ոչ թե պակասում է, այլ ավելանում, որովհետև ավելանում են շինծու քրեական գործերը, քաղաքական ռեպրեսիաները, որոնց միջոցով Փաշինյանը փորձում է ապահովագրել իր իշխանությունը։ Հիմա էլ նրանք քաղաքական որոշում են կայացրել, որ այն համայնքապետերը, որոնք չեն ենթարկվում իշխանության որոշումներին, հայտնվեն բանտերում, և այնպիսի մարդկանց նշանակեն, ովքեն կենթարկվեն իրենց ծրագրերին»,- այսօր Հակակոռուպցիոն դատարանի շենքի բակում, լրագողների հետ զրույցում ասաց, ՀՀԿ երիտասարդական կազմակերպության ղեկավար Հենրիխ Դանիելյանը: «Այս հետապնդումների հերթական զոհը Մասիսի համայնքապետ Դավիթ Համբարձումյանն է, ով, իմանալով, որ կալանավորվելու է, երեկ վերադարձավ: Պետք է փաստենք, որ սա քաղաքական հետապնդում է։ Նիկոլ Փաշինյանը փորձում է Մասիս խոշորացված համայնքում իր թեկնածուին առաջ քաշել, բայց դա նրանց մոտ չի ստացվելու, որովհետև ավագանիների մեծամասնությունը Դավիթ Համբարձումյանի դաշինքի ներկայացուցիչներն են, և մի ընտանիքի պես կուռ՝ կարողանալու են ձևավորել այն քաղաքական ընթացքը, որն ընտրել են մասիսցիները»,- հավելեց Դանիելյանը։