«Հայաստանը հացով ու փողով չափելու երկիր չէ». Արա Պողոսյան

Քաղաքագետ Արա Պողոսյանը ֆեյսբուքյան իր էջում գրել է․ «Make Armenia Great Again - արտահայտության մեջ հույս կա, պայքարի լույս կա։ Իսկ պատկերացրեք, երբ այն դառնում է ռազմավարություն՝ ստրատեգիա, երկրի զարգացման փիլիսոփայություն, որը արտահայտվում է պետական բոլոր ինստիտուտներից մինչև հոգևոր և հանրային կյանքում։ Պատկերացրեք, երբ այդ ռազմավարությունը մտնում է հասարակության բոլոր շերտերի մտածողության ու կենցաղի մեջ, և յուրաքանչյուր ոք իր աշխատանքով ամեն օր նպաստում է «Make Armenia Great Again» գաղափարի ռազմավարության իրագործմանը․․․
Հայաստանը չի՛ կարող լինել պարզապես կենցաղ, Հայաստանը չի՛ կարող լինել պարզապես «այստեղ հաց, այստեղ կաց» կարգախոսով աննպատակ երկիր, Հայաստանը իդեա է, գաղափար, եթե կուզեք՝ մի «Բրաբիոն ծաղիկ», որի հետևից պետք է գնալ մաքրված, ու տենչալ նրան, ամեն օր այն դարձնելով ավելի հզոր, ավելի բարեկեցիկ՝ մոտենալ ՀԱՅԱՍՏԱՆ գաղափարին, երազանքին։
Հայաստանը հատվածական սիրելու երկիր չէ, Հայաստանը հացով ու փողով չափելու երկիր չէ, Հայաստանը ամենադժվար, ամենաանհասանելի իդեալներին հասնելու և հասցնելու երկիր է։
Հայաստանը սովորական չափիչ սարքերով ու տեխնոլոգիաներով չափելու երկիր չէ, այլ անտրաբանական տրամաբանության երկիր է։
Ինչքան փորձել են և փորձում են, և դեռ կփորձեն Հայաստանը պարփակել լեռների մեջ՝ կտրելով ջրերից և արտաքին աշխարհից, Հայաստանը միշտ մնացել է «ծովից–ծով» և անպայման այն մի օր կհասնի իր ծովին․․․»։