Հովիկ Աղազարյանը զիլ դրվագներ էր խոստանում․ տպվել է նրա սկանդալային գիրքը 

Նախկին ՔՊ-ական Հովիկ Աղազարյանի սկանդալային գիրքը տպվել է, նոյեմբերի 5-ին գրքի շնորհանդեսը կլինի: Այս մասին հայտնել է «Հրապարակ»-ը։

«Նիկոլ Փաշինյանի՝ իր նկատմամբ հալածանքներից հետո Աղազարյանը բացահայտեց, որ գիրք է գրում, որն անվանելու է «Երկրի իրական կողմը»՝ ի հակակշիռ Նիկոլ Փաշինյանի՝ «Երկրի հակառակ կողմը» գրքի, որը նա գրում էր ընդհատակում գտնվելու ժամանակ՝ 2008-2009 թվականներին:

Գիրքն ինքնակենսագրական է, եւ հիմնական մասը նվիրված է լինելու իր այն հեռախոսի պարունակությանը, որը առ այսօր գտնվում է իրավապահների մոտ եւ որի պարունակությունը Փաշինյանը դարձրեց հանրային սեփականություն: Անցած տարի նրա հեռախոսը քննչական գործողությունների ժամանակ ապօրինի առգրավել էին:

Հիշեցնենք նաեւ, որ Աղազարյանն իրավապահների ուշադրության կենտրոնում հայտնվեց այն բանից հետո, երբ մերժեց Փաշինյանի խնդրանքը՝ մանդատը վայր դնելու վերաբերյալ։

Հեղինակը զիլ դրվագներ է խոստանում՝ հատկապես Նիկոլ Փաշինյանի հետ կապված պատմություններում:
Նա Փաշինյանին համեմատել է Վազգեն Սարգսյանի հետ, բայց, ինչպես ինքն է ասում՝ «վատ Վազգենի», ավելի ճիշտ՝ Վազգենի վատ կողմերի հետ, թե ինչպես վերջինիս շրջապատը, ստրկաբար հնազանդվելով, Վազգենից վատ Վազգեն կերտեց»,- գրել է լրատվամիջոցը։