«Քաղաքական առումով կոնֆլիկտը լուծված է, խնդիրներ ունենք սոցիալ-հոգեբանական մակարդակում». Նիկոլ Փաշինյան

«Մեր հաջողության մեծագույն պատմությունը 2025-ի օգոստոսի 8-ին Վաշինգթոնում տեղի ունեցած խաղաղության գագաթնաժողովն էր, որի արդյունքներով ընդունվեց հռչակագիր և նախաստորագրվեց ՀՀ-ի և Ադրբեջանի միջև խաղաղություն և միջպետական հարաբերություններ հաստատելու մասին համաձայնագիրը: Այդպիսով ՀՀ-ի և Ադրբեջանի միջև հաստատվել է խաղաղություն»,- «Կառուցելով խաղաղություն և բազմակողմանի համագործակցություն» թեմայով համաժողովին ասել է վարչապետ Նիկոլ Փաշինյանը:

Անդրադառնալով ներկա մարտահրավերներին՝ Փաշինյանն ընդգծել է, որ դրանցից մեծագույնը և հիմնարարն այն է, որ խաղաղությունը տարօրինակ և անծանոթ է հնչում: «Պետք է արձանագրենք, որ խաղաղությունն անծանոթ հասկացություն և միջավայր է ՀՀ-ի ու Ադրբեջանի համար: Մեր անկախությունների առաջին օրից մենք չգիտենք, թե ինչ է խաղաղությունը, խաղաղություն երևույթի հետ երբեք չենք առնչվել: Ավելի քան 30 տարվա կոնֆլիկտը քաղաքական առումով լուծված է, իսկ սոցիալ-հոգեբանական առումով խնդիր կա:

ՀՀ-ի և Ադրբեջանի միջև գործարքի էությունը հետևյալն է՝ ՀՀ-ն և Ադրբեջանը ճանաչում են միմյանց տարածքային ամբողջականությունը՝ Ալմաթայի հռչակագրի հիման վրա, բացում են տարածաշրջանային կոմունիկացիաները, իրականացնում են դելիմիտացիա և հանգիստ են թողնում միմյանց»,- նշել է Փաշինյանը և հավելել. «Քաղաքական մակարդակում մենք խնդիրներ չունենք, խնդիրներ ունենք սոցիալ-հոգեբանական մակարդակում: Ներքին կապ եմ տեսել, որ օրինակ ինչքան Ադրբեջանում հնչում է Բասարգեչար անունը, այնքան ՀՀ-ում հնչում է Արցախ անունը»: