0,5-1,5 միլիոն դրամը ՔՊ-ում դժգոհության առիթ է դարձել. «Ժողովուրդ»

Իշխող «Քաղաքացիական պայմանագիր» կուսակցության վերջին նիստում որոշվել է՝ առաջիկա ընտրություններին կուսակցության ցուցակում ընդգրկվելը կարժենա 500 հազարից 1 միլիոն 500 հազար դրամ։ Ըստ որոշման՝ կուսակցականները ցուցակում ընդգրկվելու համար պետք է վճարեն 500 հազար դրամ, իսկ ոչ կուսակցականները՝ 1,5 միլիոն դրամ, գրում է Ժողովուրդը՝ հավելելով. «Այս նոր «տնտեսական մոդելը», ինչպես կոչում են կուսակցության ներսում, բուռն դժգոհություն է առաջացրել հենց ՔՊ-ականների շրջանում։ Աղբյուրների փոխանցմամբ՝ շատերն արտահայտել են բաց դժգոհություն՝ հարցնելով. «Ինչո՞ւ մենք՝ կուսակցության անդամներս, պետք է գումար վճարենք ցուցակում ընդգրկվելու համար, այդ գաղափարը ո՞ւմն է, և ինչո՞ւ պարտադիր է բոլորի համար»։
Փորձեցինք պարզել, թե ում նախաձեռնությունն է այս ֆինանսական պահանջը, և ինչ սկզբունքով կկազմակերպվի ցուցակում թեկնածուների հերթականությունը։ ՔՊ վարչության անդամ Արուսյակ Մանավազյանը նշեց, որ ցուցակում ներառելու համար կուսակցությունը կսահմանի առաջադրված անդամների հստակ քանակ (օրինակ՝ 300 հոգի), ովքեր պետք է վճարեն նախատեսված 500 հազար կամ 1,5 միլիոն դրամը, և ընտրություններից հետո, հավաքած արդյունքների հիման վրա, կձևավորվի նրանց հերթականությունը։ Մանավազյանը հավելեց, որ հարցը դեռ քննարկման փուլում է. «Կուսակցությունում կկայացվի քվեարկություն. ով ավելի բարձր ռեյտինգ կունենա՝ նա էլ կզբաղեցնի առաջատար դիրքերը ցուցակում»,- պարզաբանեց նա։
Ինչ վերաբերում է վճարի գաղափարի հեղինակին, պատգամավորը չցանկացավ անուն նշել՝ փոխանցելով, որ այն կոլեգիալ որոշում է»։