Գյումրիում 2-ամյա տղան 3-րդ հարկի պատուհանագոգից վայր է ընկել

489

Ուրբաթ, 14 նոյեմբերի, 2025 թ., 23:36

Այսօր՝ նոյեմբերի 14-ին, արտակարգ դեպք է տեղի ունեցել Շիրակի մարզում։ Ժամը 15:10-ի սահմաններում ՀՀ ՆԳՆ Ոստիկանության Շիրակի մարզի քրեական վարչությունում հերթական օպերատիվ տեղեկությունն է ստացել, որ Գյումրու բժշկական կենտրոն է տեղափոխվել մի երեխա։ Բժիշկները քրեական ոստիկաններին հայտնել են, որ երեխան իրենց մոտ է տեղափոխվել ծնողի ուղեկցությամբ, ում տեղում անհրաժեշտ բուժօգնություն են ցուցաբերել, ապա Գյումրու շտապօգնության ավտոմեքենայով երեխային տեղափոխել են Երևանի «Մուրացան» մանկական հիվանդանոց։ Պարզվել է, որ երեխան Շիրակի մարզի բնակիչ 2-ամյա տղա է, ով Գյումրու իրենց շենքի 3-րդ հարկի բնակարանի պատուհանագոգից անզգուշաբար վայր է ընկել։

Երեխային Երևանի «Մուրացան» հիվանդանոց տեղափոխվելուց հետո Գյումրու շտապօգնության ավտոմեքենան Գյումրի վերադառնալիս Երևանում՝ Սեբաստիա փողոցում, վթարի է ենթարկվել, վթարի հետևանքով, ըստ նախնական տեղեկությունների, տուժածներ չկան: