ԱՄՆ-ն Վենեսուելայի ափերին բռնագրավել է երրորդ նավթատարը

Bloomberg-ը, հղում անելով աղբյուրներին, հաղորդում է, որ ԱՄՆ-ի ուժերը Վենեսուելայի ափերին բռնագրավել են ևս մեկ նավթատար։

Բռնագրավված Bella 1 նավթատարը նավարկում էր Պանամայի դրոշի ներքո և ԱՄՆ-ի պատժամիջոցների տակ է։ Գործակալությունը նշում է, որ բռնագրավումը տեղի է ունեցել դեկտեմբերի 20-ի առավոտյան «սուպերտանկեր» Centuries-ի և դեկտեմբերի 10-ին Skipper-ի բռնագրավումից հետո։

Դեկտեմբերի 17-ին ԱՄՆ-ի նախագահ Դոնալդ Թրամփը Նիկոլաս Մադուրոյի կառավարությունը որակեց՝ որպես օտարերկրյա ահաբեկչական կազմակերպություն։ Նա հրամայեց լիարժեք և ամբողջական ծովային շրջափակում սահմանել Վենեսուելայի հետ կապված պատժամիջոցների տակ գտնվող բոլոր նավթատարների նկատմամբ։

The Wall Street Journal-ը նախկինում հայտնել էր, որ Թրամփը հեռախոսով խոսել է Մադուրոյի հետ, նախքան Վաշինգթոնի կողմից նրա և նրա շրջապատի նկատմամբ պատժամիջոցներ կիրառելը։ Աղբյուրները պնդում են, որ ամերիկացի առաջնորդը փաստացի վերջնագիր է ներկայացրել Վենեսուելայի նախագահին՝ նրան հրահանգելով լքել երկիրը։ Դեկտեմբերի 8-ին The Washington Post-ը հայտնել է, որ Մադուրոն մտադրություն չունի լքելու Վենեսուելան։