«Կուսակցական կոռուպցիոն կասկածով սկանդալներ են եղել մի քանի անգամ, բոլորը կապվում են ՔՊ-ի հետ»․ Սևակ Հակոբյան

Լրագրող, խմբագիր Սևակ Հակոբյանը ֆեյսբուքյան էջում տեսանյութ է հրապարակել՝ կից գրառմամբ․ «Նիկոլ Փաշինյանը վերջերս Հակակոռուպցիոն քաղաքականության խորհրդի նիստում անդրադարձել է կուսակցությունների ֆինանսավորման և դրա նկատմամբ վերահսկողության խնդիրներին։ Օրերս էլ արդարադատության նախարար Սրբուհի Գալյանն ասաց, թե քննարկում են հնարավոր փոփոխությունները, որոնք կարելի է անել կուսակցությունների ֆինանսավորման թափանցիկության հետ կապված:
Թե՛ արդարադատության նախարարը, թե՛ Փաշինյանը մեկ կարևոր հանգամանք բաց թողեցին՝ խոսել ՔՊ-ի մասին՝ օրինակներով։ Հիշեցնեմ՝ ՀՀ քաղաքական պատմության մեջ կուսակցական կոռուպցիոն կասկածով սկանդալներ են եղել մի քանի անգամ, որոնք բոլորը կապվում են ՔՊ-ի հետ։ 2023թ․ մամուլը հրապարակեց, որ համաձայն անկախ աուդիտորական եզրակացության, ՔՊ-ն թուլատրելի չափից շատ անդամավճար է հավաքել, շուկայականից ցածր գնով կուսակցական գրասենյակներ վարձակալել և նվեր ստացել գրասենյակի տարածքներ, որոնք պարզ չէ՝ ով է տվել, ինչ ծառայության դիմաց և ինչ իրական նպատակներով:
2024 թվականին մեկ այլ սկանդալ բռնկվեց կուսակցության հաշվետվության վերաբերյալ․ պարզվեց՝ 2022 թվականին ունեցած 31 նվիրատուներից 15-ը հերքել են, որ գումար են նվիրաբերել, մյուսները ասել են, որ չեն հիշում։ Այդ, ինչպես նաև Երևանի ավագանու վերջին ընտրությունների դրամահավաքից հետո պարզվեց, որ մարդկանց անուններ են հայտնվել նվիրատուների ցանկում, այն էլ՝ 2,5 մլն դրամ, որ իրենք տեղյակ չեն և ավելին՝ այդքան գումար չունեն, իրենց եկամտից շատ է, ունենային էլ՝ չէին փոխանցի ՔՊ-ին։ Մեկ այլ հաշվետվությամբ, կառավարող ուժին ֆինանսավորել են մի շարք պետական և ՏԻՄ մարմինների հետ միլիոնավոր դրամների պայմանագրեր կնքած, պետական արտոնություններից օգտված, ինչպես նաև կառավարող ուժի ներկայացուցիչներին փոխկապակցվող բիզնեսների ներկայացուցիչներ, կառուցապատողներ և այլք։
Ու այսքանից հետո, ՔՊ-ական կառավարությունը խոսում է կուսակցությունների ֆինանսական աղբյուրների, նվիրատուների ու թափանցիկության մասին։ Գուցե հենց ՔՊ-ի օրինա՞կն է հիմք հանդիսացել հակակոռուպցիոն նիստում հարցը քննարկելու համար»։