«Ալկոհոլի ազդեցությունն առողջության վրա և կախվածության ռիսկերը». ԱՆ

1032

Շաբաթ, 16 մայիսի, 2026 թ., 02:06

Ալկոհոլի ազդեցությունն առողջության վրա և կախվածության ռիսկերը.
Էթանոլը (ալկոհոլը) հոգեակտիվ նյութ է, որն ունի տոքսիկ և կախվածություն առաջացնող հատկություններ: Դրա պարբերաբար օգտագործումը կտրուկ մեծացնում է առողջական և սոցիալական բազմաբնույթ ռիսկերը:
Ալկոհոլը կենտրոնական նյարդային համակարգն ընկճող նյութ է, որն ազդում է նյարդային ազդակների փոխանցման վրա՝ առաջացնելով հետևյալ խանգարումները.
* Դանդաղում է ռեակցիան, թուլանում է կենտրոնացումը և ինքնակառավարումը
* Խաթարվում է կոորդինացիան, խոսքի հստակությունը և տարածական կողմնորոշումը
* Նեղանում է տեսադաշտը և նվազում է տեսողական ինֆորմացիայի մշակման արդյունավետությունը:
Ալկոհոլային խմիչքները թեև ունեն բարձր էներգետիկ արժեք, սակայն զուրկ են էական սննդարար նյութերից (վիտամիններ, հանքանյութեր, ամինաթթուներ):
Սա որակվում է որպես «դատարկ կալորիաների» աղբյուր, ինչը նպաստում է նյութափոխանակության խանգարումներին, մասնավորապես՝ ճարպակալմանը:
Ալկոհոլի չարաշահումը և պարբերաբար օգտագործումը (ալկոհոլային կախվածությունը) մի շարք պաթոլոգիաների հիմնական պատճառ են.
* Լյարդի ճարպային ախտահարում, ալկոհոլային հեպատիտ և լյարդի ցիռոզ
* Ստամոքսի և տասներկումատնյա աղիքի լորձաթաղանթի էրոզիվ-խոցային ախտահարումներ
* Զարկերակային հիպերտենզիա, կարդիոմիոպաթիա և ռիթմի խանգարումներ
* Տագնապային խանգարումներ, դեպրեսիա և սոցիալական մեկուսացում:
Ալկոհոլի օգտագործումը հղիության ընթացքում խստիվ հակացուցված է. այն թափանցում է ընկերքով՝ առաջացնելով պտղի ալկոհոլային սպեկտրի խանգարումներ (FASD), վիժման ռիսկ և պտղի զարգացման արատներ:
Ելնելով օրգանիզմի ձևավորման փուլից և նյարդային համակարգի խոցելիությունից՝ ալկոհոլի օգտագործումը երեխաների և դեռահասների կողմից անթույլատրելի է:
Կախվածության խնդիրների դեպքում խորհուրդ է տրվում դիմել մասնագիտացված բժշկական օգնության:

Աղբյուրը` ՀՀ Առողջապահության նախարարություն