«Քոչարյանի ժամանակ մարդուն լռեցնելու համար թիրախավորել են մորը, ընտանիքը, անունը». Արման Բաբաջանյան

«Հանուն Հանրապետության» կուսակցության առաջնորդ Արման Բաբաջանյանի ֆեյսբուքյան գրառումը․ «Օրերս Քոչարյանն իր ելույթներից մեկով փաստացի բացահայտեց այն, ինչ տարիներ շարունակ թաքցվում էր․ մորս դեմ ցուցմունք տալու մասին այդ ցինիկ պատմության աղբյուրը անձամբ Քոչարյանի իշխանության հաշվեհարդարի մեքենան է։
Կա քրեական գործ, կան մարդկանց խոստովանություններ, կան կոնկրետ վկաներ, որոնք կարող են պատմել՝ ինչպես է Քոչարյանի ուղղակի դրդմամբ գլխավոր դատախազ Աղվան Հովսեփյանի միջոցով գործ հարուցվել իմ և մորս դեմ։
Ռազմական ոստիկանության պետ Վովա Գասպարյանը կպատմի կեղծ «անանիմկայի» ծագման ու օգտագործման մանրամասները։ Գլխավոր դատախազի տեղակալ Գագիկ Ջհանգիրյանը կպատմի գործի տեխնիկական դրվագները, այդ թվում՝ ինձ ազատ արձակելու առաջարկների մասին։
Այս ամենը մեկ բան է ապացուցում․ Քոչարյանի ժամանակ իրավապահ համակարգը գործել է ոչ թե օրենքով, այլ քաղաքական վրեժի տրամաբանությամբ։ Մարդուն լռեցնելու համար թիրախավորել են մորը, ընտանիքը, անունը։
Սա ոչ թե մեղադրանք է իմ դեմ, այլ ուղիղ մեղադրական ակտ Քոչարյանի ստեղծած մաֆիական, բանդիտական համակարգի դեմ, համակարգ, որը օրենքի անունից գործեր էր սարքում, մարդկանց ընտանիքներն էր թիրախավորում և պետական մեքենան օգտագործում անձնական ու քաղաքական հաշվեհարդարի համար»: