«Չե՞ք կարծում, որ Ազգային ժողովը թրոլլինգի համար լավագույն վայրը չէ»․ Վահագն Ալեքսանյան

«Ուժեղ Հայաստան» խմբակցությունը Եվրոպական ինտեգրման հարցերով մշտական հանձնաժողովի նախագահի թեկնածու առաջադրեց Արեգա Հովսեփյանին: Նրա թեկնածությունն ԱԺ-ում ներկայացրեց պատգամավոր Լենա Մաթևոսյանը։

«Ինձ մոտ տպավորություն է, որ ձեզ մոտ այս հանձնաժողովի ընտրությունը թրոլլինգ է, ու երբ որ պարոն Կարապետյանը հայտնեց այդ հանձնաժողովի անունը, ձեր ամբողջ խմբակցությունը ծիծաղեց ու մինչև հիմա էլ ծիծաղում է, և իմ այս տպավորությունը ամրապնդվում է։ Չեք կարծո՞ւմ, որ Ազգային ժողովը թրոլլինգի համար լավագույն վայրը չէ։ Եվ, օրինակ, դուք՝ ինքներդ, և ձեր խմբակցությունը կո՞ղմ եք ԵՄ անդամակցության համար հայտ ներկայացնելուն»,- դիմելով Մաթևոսյանին՝ ասաց ՔՊ խմբակցության պատգամավոր Վահագն Ալեքսանյանը։

Մաթևոսյանը պատասխանեց, որ խմբակցությունը կհայտնի իր դիրքրոշումը, իսկ ինքը կողմ է բոլոր այն որոշումներն, որոնք բացառապես Հայաստանի շահն են սպասարկում։

«Պարո՛ն Ալեքսանյան, հորդորում եմ երազների հարցում զգույշ լինել, փաստորեն իրականացան»,- հավելեց ընդդիմադիր պատգամավորը։