«Եթե մենք լսեինք Բրյուսելին, Վրաստանն այսօր պետություն կլիներ միայն թղթի վրա»․ Պապուաշվիլի

Եթե Վրաստանը հետևեր Բրյուսելի խորհուրդներին, ապա կվերածվեր միայն թղթի վրա գոյություն ունեցող պետության։ Այս մասին լրագրողների հետ զրույցում ասել է խորհրդարանի նախագահ Շալվա Պապուաշվիլին։ «Կարծում եմ՝ ավելի լավ է թեկնածու երկրի կարգավիճակ ունենալ միայն թղթի վրա, քան պետություն լինել միայն թղթի վրա։ Սա այն ընտրությունն է, որը պետք է կատարել։ Նախևառաջ, եթե մենք լսեինք Բրյուսելին և գնայինք Ռուսաստանի հետ էսկալացիայի, Վրաստանը նույնպես տնտեսական վնասներ կկրեր, ինչպես Մոլդովան։ Եթե մենք լսեինք Բրյուսելին և գնայինք Ռուսաստանի հետ էսկալացիայի, ապա Վրաստանը մեծ հավանականությամբ ռազմական առճակատման մեջ կմտներ Ռուսաստանի հետ, և այսօր մենք կլինեինք պատերազմի հետևանքով նույնքան ավերված երկիր, որքան Ուկրաինան»,- ասել է Պապուաշվիլին։

Նշենք, որ ԵՄ ընդլայնման հարցերով եվրոհանձնակատար Մարտա Կոսը նախօրեին հայտարարել էր, որ Վրաստանը ԵՄ անդամակցության թեկնածու է մնում միայն թղթի վրա: