«Մենք ոչ թե զավթել, այլ ազատագրել ենք ՊՊԾ գունդը». Արեգ Կյուրեղյան

Դեկտեմբերի 25-ին Երևանի ընդհանուր իրավասության դատարանում շարունակվեց «Սասնա ծռերի» գործով հերթական նիստը: Դատավոր Մեսրոպ Մակյանը հնարավորություն տվեց Արեգ Կյուրեղյանին՝ հանդես գալ ելույթով: Նա հայտարարեց. «Մեղադրանքը, ապացույցներն ամբողջովին կեղծված են: Այն ամենակարևոր փաստը, որ մենք ՊՊԾ գունդը զավթել ենք, սուտ է, ՊՊԾ-ն ազատագրվել է: Այն մեղադրանքը, որ զավթված է եղել իշխանությանը պայմաններ թելադրելու համար, կրկին սուտ է: Պահանջներ եղել են ոչ միայն իշխանությանը, այլև իշխանությունը զավթած ռեժիմին»:

Ըստ նրա՝ իրենց գործողությունները միտված են եղել սահմանադրական կարգը և արդարությունը վերականգնելուն: Եղել է ապստամբություն, այնինչ այդ մասին բառ անգամ չկա մեղադրականում:

Ա.Կյուրեղյանը նշեց, որ ՊՊԾ գունդն իշխանությանը ծառայելու դիմաց ստացել էր իրավունք և Երևանում զբաղվում էր, իրականացնում ու ապահովում էր թմրանյութերի և անբարոյականության գործը: Նրանք էին գրանցում այդ գործով զբաղվողներին:

«ՊՊԾ գունդը եղել է չարիք ՀՀ-ի համար: Չի գործել ՀՀ շահերից»,- ասաց նա:

Ա. Կյուրեղյանն իշխանությունների կամակատարներ, կեղծ վճիռներ կայացնողներ համարեց նաև դատարաններին, այդ թվում՝ գործը վարող դատավոր Մ.Մակյանին: «ՀՀ-ում դատարան գոյություն չունի»,- նշեց նա: Այդ գնահատականից հետո դատավորը 2 անգամ նկատողություն հայտարարեց՝ դատարանի նկատմամբ անհարգալից վերաբերմունքի համար:

Ա.Կյուրեղյանի պաշտպան Ռ.Եգորյանը դատարանին հորդորեց հանդուժողական լինել իր պաշտպանյալի հայտարարությունների հանդեպ: Դրան ի պատասխան՝ դատավորը հարցադրեց. «Եթե Ձեր պաշտպանյալը հայտարարում է, որ դատարան չկա, այդ դեպքում ինչու համաձայնել դատարանի այն որոշման հետ, որով ազատ էր արձակվել կալանքից»:

Ի վերջո, դատարանը Ա.Կյուրեղյանին դատարանից 20 ժամով հեռացնելու որոշում կայացրեց: