«Ի՞նչ իրավիճակ ունենք հետախուզման մեջ գտնվող նախկին պաշտոնյաների մասով». լրագրողները՝ ՀՔԾ պետին

ՀՔԾ պետ Սասուն Խաչատրյանից լրագրողները հետաքրքվեցին՝ Միքայել Մինասյանի հայտարարությունների մասով այլ անձինք հարցաքննվե՞լ են՝ բացի Արթուր Վանեցյանից:

Ի պատասխան Խաչատրյանն ասաց. «Անհրաժեշտ չեմ համարում այդ մասին բարձրաձայնել, բայց գործընթացները գնում են»:

Հարցին, թե ի՞նչ իրավիճակ ունենք հետախուզման մեջ գտնվող նախկին պաշտոնյաների մասով, ՀՔԾ պետն արձագանքեց. «Հետախուզումն իրականացնում է ՀՀ ոստիկանությունը: Ինչ խոսք, վարույթն իրականացնող մարմինն իր ամբողջ գործիքակազմով պարտավոր է և նաև իրականացնում է օժանդակություն հետախուզվող անձանց հայտնաբերելու հարցում, սակայն դա գաղտնի գործընթաց է, թույլ տվեք չխոսել այդ մասին»:

Անդրադառնալով շրջանառվող տեղեկություններին, թե ինքը Հակակոռուպցիոն կոմիտեի ձևավորումից հետո նշանակվելու է այդ կառույցի նախագահի պաշտոնում, ասաց. «Այդ տեղեկությունները ով որ տարածում է, նրան էլ հարցրեք»:

Հարցին՝ եթե նման առաջարկ լինի, կհամաձայնի՞, Խաչատրյանը պատասխանեց. «Շատ անլուրջ հարց է»: