Աննա Նաղդալյանը՝ Ադրբեջանի կողմից հրադադարը «ուխտադրուժ կերպով» խախտելու մասին

«Հենց առաջին օրվանից մենք տարածել էինք տեղեկություն, որ ԱԳ նախարարը սերտ կապի մեջ է ԵԱՀԿ համանախագահների հետ, ես իմ ասուլիսներում ասել եմ, թե աշխատանքներ ենք իրականացրել մարտական գործողությունների դադարեցման վերաբերյալ, շփումներ են եղել նաև ռուս համանախագահի հետ, նաև ռազմական շրջանակների հետ են եղել շփումները, և մենք ասել ենք, որ եղել է հրադադարի պայմանավորվածություն, որը խախտվել է»,- այս մասին «Ազատության» ֆեյսբուքյան ասուլիսում հայտարարել է ՀՀ ԱԳՆ խոսնակ Աննա Նաղդալյանը՝ պատասխանելով սոցցանցի օգտատիրոջ՝ «հուլիսի 12-ի միջադեպից հետո Հայաստանի արտգործնախարարությունը հայտարարեց Ադրբեջանի կողմից հրադադարը ուխտադրուժ կերպով խախտելու մասին, ի՞նչ պայմանավորվածություն է եղել, որ Ադրբեջանը խախտել է ուխտադրուժ կերպով» հարցին։

Հարցին, թե ի՞նչ է արվում Նախիջևանի տարածքում հայտնված Նարեկ Սարդարյանին վերադարձնելու համար, Ա․ Նաղդալյանն ասել է, որ կապ են հաստատել Նախիջևանի իշխանության հետ․ «Հարցը գտնվում է Հայաստանում Կարմիր խաչի և Կարմիր մահիկի գրասենյակների տիրույթում և գաղտնիությամբ պայմանավորված ոչինչ չի կարող ասել, նաև նրա առողջական վիճակի վերաբերյալ»,- ասել է նա։