Վանեցյանը գերիների հարցը լուծելու մասին իր խոսքը կոնտեքստից կտրված է համարում

ԱԱԾ նախկին տնօրեն, «Հայրենիք» կուսակցության ղեկավար Արթուր Վանեցյանն այսօր՝ լրագրողների հետ զրույցի ժամանակ ասաց, որ իր՝ երեկվա հայտարարությունը, թե ինքը կարող է երեք օրում լուծել գերիների հարցը, եթե գա իշխանության, իրականում կոնտեքստից կտրված է. «Կրկնում եմ ևս մեկ անգամ, ես ասել եմ՝ այո, իշխանական լծակներ ունենալու դեպքում, աշխատանքը ճիշտ կազմակերպելու դեպքում հնարավոր է շատ արագ լուծել գերության մեջ գտնվող մեր տղաների հարցը: Ես ասել եմ՝ այս իշխանությունները ապաշնորհ և ապիկար են, և նրանք չեն կարողանում որևէ հարց լուծել, այդ թվում՝ մեր օրակարգում գտնվող ամենակարևոր հարցը»,- հայտարարեց նա:

Վանեցյանի խոսքով՝ գերիների մի մասին հաջողվել է վերադարձնել ՌԴ-ի և անձամբ Վ. Պուտինի միջնորդությամբ: