«Ես տարածքներ հանձնելու մասին ոչ մի նախադասություն չեմ ասել». Վահե Ղալումյան

«Պատիվ ունեմ» դաշինքի պատգամավոր Տիգրան Աբրահամյանն այսօր ԱԺ-ում, կրկնելով իր ընդդիմադիր գործընկերոջ՝ «Հայաստան» դաշինքի պատգամավոր Ագնեսա Խամոյանի հարցը, դիմեց Տարածքային կառավարման, ՏԻՄ, գյուղատնտեսության հանձնաժողովի նախագահի թեկնածու, ՔՊ-ական պատգամավոր Վահե Ղալումյանին. «Այսպես կոչված անկլավների հետ կապված Ձեր պատասխանը, անկեղծ ասած, ինձ որևէ ձևով չբավարարեց: Ասում եք՝ Ձեր խոսքերը խեղաթյուրվել են, պարզբանեք՝ այո, կամ ոչ: Հենց այս պատասխանից շատ բան է կախված»:

«Ես տարածքներ հանձնելու մասին ոչ մի նախադասություն չեմ ասել: Ես նորից եմ շեշտում, որ կան երկկողմանի տարածքներ, որոնք ԽՍՀՄ-ի քարտեզներով լինելով մերը՝ գտնվում են Ադրբեջանի վերահսկողության տակ, և՝ հակառակը: Թե էդ մամուլի նյութերն ու վերնագրերն ինչ են ասում ..., ես ևս մեկ անգամ ասում եմ իմ ասածը»,- հարցին ի պատասխան ասաց Ղալումյանը:

Աբրահամյանը հետաքրքրվեց, թե արդո՞ք ՔՊ-ական պատգամավորը տեղյա՞կ է, թե ինչու է ռուսական կողմը տեղակայում ուղեկալներ Տավուշի տարբեր հատվածներում: Ղալումյանը, սակայն, հայտնեց, որ ՊՆ-ի կողմից հայտած պաշտոնական պարզաբանումից զատ այդ թեմայի վերաբերյալ ավելացնելու ոչինչ չունի: