«Թուրքիայի հետ հարաբերությունների մասին կխոսեմ նաև Դուշանբեում». Փաշինյան

«Ստացել ենք Հայաստանի և տարածաշրջանի համար խաղաղ զարգացման դարաշրջան բացելու համար մանդատ»,- ԱԺ-ում հայտարարեց ՀՀ վարչապետ Նիկոլ Փաշինյանը՝ պատասխանելով ՔՊ-ական պատգամավոր Սարգիս Խանդանյանի հարցին, թե հաջորդիվ ի՞նչ քայլեր են ձեռնարկվելու Հայաստան-Թուրքիա հարաբերությունների կարգավորման, երկաթուղու և ճանապարհների գործարկման ուղղությամբ։

«Հաջորդ քայլը, երբ փոխադարձաբար արտահայտվում է խոսակցություն սկսելու պատրաստակամություն, ենթադրվում է, որ պիտի կոնկրետ քայլեր ձեռնարկվեն այդ խոսակցությունն սկսելու համար։ Այդ խոսակցությունը կարող է լինել աշխատանքային։ Ես կարծում եմ, որ, օրինակ, խոսակցությունը տրամաբանորեն պիտի լինի նախ աշխատանքային, ապա, եթե տեսնենք, որ կան կոնկրետ արդյունքներ արձանագրելու հնարավորություններ կամ կա դրա անհրաժեշտությունը, պիտի լինեն և կարող են լինել նաև հրապարակային...: Ի միջի այոց, այսօր ես մեկնում եմ Դուշանբե՝ մասնակցելու ՀԱՊԿ գագաթնաժողովին, որտեղ Հայաստանը կստանձնի ՀԱՊԿ նախագահությունը, և այդ թեմային անդրադարձ պիտի կատարեմ նաև այդ ֆորմատում։ Ըստ էության, ասելիքը պիտի տեղավորվի այն շրջանակում, ինչն արդեն հասցրել եմ ասել հենց այս ամբիոնից», - ասաց Նիկոլ Փաշինյանը։