«ՀՀ ԶՈՒ-ն խափանելու է այդ ավանտյուրան՝ սպառնալիքին դիմագրավելով․ միջանցք չի լինելու»․ Արմեն Գրիգորյան

Սահմանային գյուղերի բնակիչներն այսօր անվտանգության խնդիր ունեն, որովհետև ադրբեջանցիները շատ մոտ են, անկանոն կրակներ են լինում պարբերաբար։ Բավարար է գնալ այդ գյուղեր և նրանք կպատմեն՝ ինչերի միջով են անցնում։ Եվ այսպիսի ռիսկ է կանխատեսվում, որ, միգուցե, չստանալով միջանցք՝ ադրբեջանցիները կամ թուրքերը որոշեն ռազմական ուժով դա վերցնել, հատկապես, երբ այդպիսի սպառնալիքներ հնչեցվում են։ Հայաստանը պատրա՞ստ է նման սպառնալիքներին դիմագրավել, մեր ուժերն ի՞նչ վիճակում են. Factor TV-ի տաղավարում, պատասխանելով հետևյալ հարցին, ԱԽ քարտուղար Արմեն Գրիգորյանն ասել է․ «Հայաստանի Զինված ուժերը պատրաստ են դիմակայելու նման սպառնալիքի։ Եռակողմ աշխատանքային խմբում արձանագրված է, որ միջանցք չի լինելու։ Այս տրամաբանության շրջանակում կարելի է այս քննարկումն ավարտված համարել։ Ինչ վերաբերում է այդպիսի ավանտյուրային, բնականաբար, մենք փորձելու ենք մեր Զինված ուժերով, ինչպես նաև օգտագործելով բոլոր եղած հնարավորությունները միջազգային հանրության շրջանում կամ միջազգային կառույցներում, խափանելու ցանկացած նման գործունեություն»։