«Ցուցմունք տված ոստիկանը ձայնից է որոշել, որ «Բ-ի տղա, Նիկոլ» ասողը ես եմ». Սարգիս Կարապետյան

ՀՅԴ Երևանի քաղաքային կոմիտեի նախագահ Սարգիս Կարապետյանը, անդրադառնալով «Բ-ի տղա, Նիկոլ» արտահայտության առնչությամբ Երևան քաղաքի առաջին ատյանի ընդհանուր իրավասության դատարան ուղարկված մեղադրական եզրակացությանը, լրագրողների հետ զրույցում ասել է. «Փորձ է արվում ներկայացնել, որ մի 10-15 խուլիգան են, որոնք խուլիգանական արարք են անում... Ես ավելի մեծ բաներ եմ պատրաստ անել իմ հայրենիքի համար, քան՝ խուլիգանություն: Նոյեմբերի 13-ից սկսած՝ երևի մի 30-40 անգամ բերման եմ ենթարկվել ոստիկանական բաժանմունքներ, հստակ հրահանգ է եղել՝ ինձ մեկուսացնելու: Իսկ էդ օրվա մասով ասեմ, որ ոստիկանությունը չունի փաստ, որ ես արտահայտություններ եմ արել Նիկոլ Փաշինյանի հասցեին, որը չի նշանակում, թե համամիտ չեմ այդ մտքի հետ: Էն ոստիկանը, որը ցուցմունք է տվել, որ ես արել եմ էդ արտահայտությունը, նշել է, որ ճանաչել է ինձ՝ ձայնից, այսինքն՝ ոչ թե տեսել է այդ արտահայտությունն անելիս, այլ՝ ձայնից»: Կարապետյանի խոսքով՝ «կեղծ ցուցմունք տված ոստիկանները վերջում պատասխան են տալու»: