Կիրակի, 22 մայիսի, 2022 թ.
|
Ստեփանակերտում`   +20 °C

«Որոշ երկրներ Ռուսաստանի համար պարզապես տարածքներ են՝ նվաճելու համար». Էստոնիայի պաշտպանության նախարար

«Որոշ երկրներ Ռուսաստանի համար պարզապես տարածքներ են՝ նվաճելու համար». Էստոնիայի պաշտպանության նախարար
509
Երկուշաբթի, 03 հունվարի, 2022 թ., 22:30

Էստոնիայի պաշտպանության նախարար Կալլե Լաանետը հայտարարել է, որ Ռուսաստանն իրական վտանգ է ներկայացնում Եվրոպայի և ՆԱՏՕ-ի համար։

«Մեր մայրցամաքի և դաշինքի անվտանգությունն իրական վտանգի տակ է: Եվրոմիության արևելյան հարևանը չի ցանկանում ապրել խաղաղության և ժողովրդավարության մեջ և խաղաղության հնարավորություն չի տալիս ուրիշներին: Որոշ երկրներ նրա համար պարզապես տարածքներ են՝ նվաճելու համար, այլ ոչ անկախ պետություններ, որտեղ ժողովուրդներն ունեն իրենց լեզուն, մշակույթը և սեփական զարգացման ուղին ընտրելու անքակտելի իրավունքը, և դրա հիման վրա՝ իրենց գործընկերները», - ասել է Լաանեթը երկուշաբթի օրը Տալինում «Խորհրդային Ռուսաստանի հետ պատերազմի զինադադարի 102-րդ տարեդարձի կապակցությամբ» պսակ դնելու արարողության ժամանակ:

Նրա խոսքով՝ ներկայում Էստոնիան ունի ուժեղ դաշնակիցներ, որոնց հետ միասին փոխադարձաբար պաշտպանում և հոգ են տանում միմյանց նկատմամբ:

Հիշատակի արարողություն է տեղի ունեցել նաև Ռուսաստանին սահմանակից Նարվա քաղաքում։ Ծաղկեպսակներ են դրվել հանրապետության տարածքում կանգնեցված պատերազմի բոլոր հուշարձանների վրա: Այդ պատերազմն Էստոնիայում կոչում են Ազատամարտ։

Հիշեցնենք, որ ռազմական գործողություններ են անցկացվել 1918 թվականի նոյեմբերի 28-ից մինչև 1920 թվականի հունվարի 3-ը։ Դրանում Էստոնիայի զինված ուժերը, որոնք պատերազմում կորցրել են 6 հազար մարդ, դիմակայել են նախ Լանդեսվերի գերմանական միլիցիայի, իսկ հետո՝ Կարմիր բանակի դեմ։

Էստոնիայի Հանրապետության և Խորհրդային Ռուսաստանի միջև զինադադարի կնքման բանակցություններն ավարտվել են 1919 թվականի դեկտեմբերի 31-ին։

Դրանից հետո մարտերը չվերսկսվեցին, և պատերազմը պաշտոնապես ավարտվեց 1920 թվականի փետրվարի 2-ին Տարտուի խաղաղության պայմանագրի կնքմամբ, ըստ որի Էստոնիայի Հանրապետությունը և ՌԽՖՍՀ-ն առաջինն աշխարհում փոխադարձաբար ճանաչեցին երիտասարդ հանրապետությունների պետական ​​անկախությունը:

Ժամանակակից Ռուսաստանը Տարտուի խաղաղության պայմանագիրը դիտարկում է որպես պատմական փաստաթուղթ, որն իրավաբանական ուժ չունի, ուստի նախապատերազմական սահմանը համարում է անվավեր։ Էստոնիայում այն ​​դիտվում է որպես պետական ​​իրավահաջորդության հիմք, և որոշ քաղաքական գործիչներ դրա հիման վրա հանդես են գալիս Պսկովի մարզի Պեչերսկի շրջանի և Լենինգրադի մարզի Զանարովյեի՝ Բալթյան հանրապետությանը պատկանելու օգտին: Սահմանային նոր պայմանագիրը ստորագրվել է 2014 թվականին, սակայն այն դեռ չի վավերացվել։