ՀՐԱՏԱՊ ԼՈՒՐ. Ռուսաստանը քիմիական զենք է կիրառել

«Մոտ մեկ ժամ առաջ ռուսական զորքերը Մարիուպոլ քաղաքում ուկրաինացի զինվորականների և քաղաքացիական անձանց դեմ անհայտ ծագման թունավոր նյութ են օգտագործել, որը նետվել է անօդաչու թռչող սարքից»։ Այս մասին հայտնում են ուկրաինական լրատվամիջոցները՝ հղում կատարելով Ազովի գնդի մամուլի ծառայությանը։

Ըստ տեղեկությունների՝ տուժածների մոտ առկա է շնչառական անբավարարություն, վեստիբուլո-ատակտիկ համախտանիշ։

Նախնական տեղեկություններով՝ ռուսական զորքերը Մարիուպոլում զարին են կիրառել, գրում են լրատվամիջոցները։

Զարինը ֆոսֆորօրգանական նյարդակաթվածային նյութ է:

Այն հեղուկի տեսքով նյութ է, որը գոլորշիանալիս վերածվում է թունավոր գազի։ Մարդկանց համար այն չափազանց վտանգավոր է, քանի որ ունի նյարդային կաթվածահար ազդեցություն։ Զարինն օրգանիզմ է մտնում մաշկի և շնչառական օրգանների, ինչպես նաև լորձաթաղանթների միջոցով։ Մնալով հագուստի վրա՝ այն շարունակում է գոլորշիանալ և թունավորել մարդուն, ինչպես նաև շրջապատող բոլորին։ Հայտնի է, որ նման գազը ավելի ծանր է, քան օդը, ուստի թունավորվելու հավանականությունն ավելի մեծ է, եթե դուք գտնվում եք նկուղում կամ որևէ հարթավայրում։